Vokzallar va aeroportlarda bagajni 24 soatgacha bepul saqlash taklif qilindi

Choralar xalqaro aeroportlar, shuningdek, yirik temiryoʻl vokzallari va avtovokzallarga tegishli. Loyihaga koʻra, ularni 2027-yil 1-iyuldan boshlab bosqichma-bosqich joriy etish rejalashtirilmoqda. Chiptasi bor yoʻlovchilarning bagajini joʻnab ketishdan oldin va yetib kelgandan keyin 24 soatgacha boʻlgan muddatga bepul saqlashga qabul qilish taklif qilinmoqda.

Transport obyektlarida taksi buyurtma qilish uchun maxsus elektron terminallar oʻrnatish taklif etilmoqda. Ular orqali yoʻlovchi qayerga borishi kerakligini koʻrsatadi, safar narxini oldindan bilib oladi va rasmiy taksi chaqiradi. Buning uchun SIM-karta va mobil internet talab etilmaydi, buyurtmadan soʻng esa terminal QR-kodli chek beradi.

Loyiha mualliflarining taʼkidlashicha, hozirda yirik transport obyektlarida Wi-Fi yetarlicha sifatli va barqaror ishlamayapti. U yerda QR-chek beradigan rasmiy taksi buyurtma qilish terminallari yoʻq, chipta egalari uchun esa bagajni bepul saqlashning yagona tartibi mavjud emas.

Muhokamada 2030-yilgacha yoʻlovchi tashishni rivojlantirish strategiyasi ham koʻrib chiqilmoqda. Podrobno.uz yozishicha, unda aeroportlardan vokzallargacha uchta temiryoʻl liniyasi koʻzda tutilgan: Toshkentda (yangi aeroportdan «Toshkent-Shimoliy» vokzaligacha), Buxoro va Urganchda. Hujjatda, shuningdek, 2027-yil iyul oyidan boshlab Toshkent aglomeratsiyasida yagona transport tizimi nazarda tutilgan. Bundan tashqari, unda poyezdlar, samolyotlar va avtobuslarga chiptalar sotib olish uchun «Bir yoʻl» platformasi tilga olingan.