Pegasus Istanbuldan Buxoro, Andijon va Termizga chiptalar sotuvini ochdi

Tashuvchi maʼlumotlariga koʻra, Buxoroga reyslarni 2026-yil 14-dekabrda, Andijonga 18-dekabrda, Termizga esa 2027-yil 1-martda ochish rejalashtirilgan. Parvozning eng arzon narxi soliqlarni hisobga olgan holda $99 yoki 89,99 yevro darajasida koʻrsatilgan (Nuz.uz maʼlumotlariga koʻra — 87 yevrodan boshlab, taxminan 1,165 mln soʻm). Yakuniy narx yoʻnalish, sana va boʻsh oʻrinlarning mavjudligiga bogʻliq. Samolyotlar Istanbuldagi Sabiha Goʻkchen nomidagi aeroport orqali uchishi koʻzda tutilmoqda, mazkur aeroport Pegasus uchun asosiy tranzit tugunlaridan biri boʻlib xizmat qiladi.

Eng arzon xalqaro Light tarifiga roʻyxatdan oʻtkaziladigan bagaj ham, standart qoʻl yuki ham kirmaydi. Qoʻshimcha toʻlovsiz yoʻlovchi oʻrindiq ostiga sigʻishi kerak boʻlgan ogʻirligi 3 kg gacha va oʻlchami 40×30×15 sm dan oshmaydigan kichik sumkani olishi mumkin, xolos. Qolgan bagaj uchun alohida haq toʻlanadi.

Fuqaro aviatsiyasi agentligi reyestriga koʻra, 2026-yil 6-oktabr kuni Turkiya kompaniyasi yoʻlovchi tashish uchun 58-K-sonli ekspluatatsiya ruxsatnomasini olgan.

Gazeta.uz eslatishicha, Turizmni rivojlantirish davlat qoʻmitasi vakillari Pegasus va Gretsiyaning Orange2Fly kompaniyalari bilan muzokaralar olib borilayotgani haqida hali 2019-yil may oyida aytishgan edi. 2021-yil yanvarida aviakompaniya yana Oʻzbekiston yoʻnalishlariga, jumladan ziyorat turizmini rivojlantirish maqsadida qiziqish bildirayotganini maʼlum qilgan.