Toshkentda Amir Temur va Yangi Sergeli koʻchalarida BRT qurilishi boshlandi

Ishlar ikki qismda olib borilmoqda. Sergeli tumanida yoʻlak Yangi Sergeli koʻchasining Choshtepa koʻchasi bilan kesishmasidan SOUEAST servis markazigacha boʻlgan 1368 metr uzunlikdagi qismida oʻtkazilmoqda. Yunusobod tumanida esa qurilish Amir Temur shoxkoʻchasining Ahmad Donish koʻchasi bilan kesishmasidagi yoʻl oʻtkazgichdan Shahriston koʻchasigacha boʻlgan 1430 metrida bormoqda.

Yoʻllar toʻliq yopilmaydi. Avtobuslar uchun yoʻlaklar qatnov qismining oʻrtasida barpo etilmoqda, qolgan yoʻlaklar boʻylab esa avtomobillar har ikki yoʻnalishda harakatlanadi. Yoʻl harakatini tashkil etish markazi yuzaga kelishi mumkin boʻlgan qiyinchiliklar haqida ogohlantirdi hamda haydovchilarga safarlarni oldindan rejalashtirishni, vaqtinchalik belgilarga eʼtibor berishni va zarur boʻlganda aylanma yoʻllardan foydalanishni tavsiya qildi.

Gazeta.uz yozishicha, parallel ravishda Shahrisabz koʻchasida ham ishlar davom etmoqda. Qismlar ulangandan soʻng Yangi Sergeli — Shota Rustaveli — Shahrisabz — Amir Temur yoʻnalishi boʻylab yagona liniya paydo boʻlishi kerak. Podrobno.uz maʼlumotlariga koʻra, Shota Rustaveli va Shahrisabz koʻchalarida allaqachon ishlab turgan alohida ajratilgan liniyaning uzunligi qariyb 8 km ni tashkil etadi.

Avvalroq Toshkent shahar hokimligi BRT tizimini Muqimiy, Qoratosh, Koʻkcha Darvoza, Parkent koʻchalari hamda Mirzo Ulugʻbek shoxkoʻchasiga ham tatbiq etish rejalari haqida xabar bergan edi.