Uzbekistan Airports aviakompaniyalar bilan Oʻzbekistonga yangi reyslarni muhokama qildi

Kompaniya maʼlumotlariga koʻra, forum 21–23-oktabr kunlari boʻlib oʻtdi. Uzbekistan Airports vakillari All Nippon Airways, Japan Airlines, Aegean Airlines, Edelweiss Air, Bangkok Airways, FlyOne Armenia, ITA Airways, SunExpress, Transavia France, Delta Air Lines, Qantas va Vietjet Air bilan uchrashuvlar oʻtkazdi. Bundan tashqari, UPS logistika kompaniyasi va Yaponiyadagi Chubu xalqaro aeroporti bilan ham uchrashuvlar boʻlib oʻtdi.

Muzokaralarda tomonlar yangi yoʻnalishlarni yoʻlga qoʻyish va amaldagi liniyalardagi reyslarni rivojlantirish masalalarini muhokama qildilar. Oʻzbekistonning hududiy aeroportlari orqali xalqaro qatnovlarni rivojlantirish va ularning transport qulayligini yaxshilash alohida muhokama qilindi. Kompaniya xabarida reyslarni ochish boʻyicha aniq kelishuvlar haqida soʻz bormagan.

Forumda milliy aviakompaniya — Uzbekistan Airways ham ishtirok etdi: uning maʼlumotlariga koʻra, Tashishlar marketingi va savdosi departamenti mutaxassislari 20-oktabrdan 23-oktabrgacha Frankfurtda faoliyat olib bordi. Aviatashuvchi Yevropa, Osiyo, Yaqin Sharq, Shimoliy Amerika va Okeaniyadagi aeroportlar hamda aviaoperatorlar bilan muzokaralar oʻtkazganini maʼlum qildi. Aviakompaniya oʻz parvozlari geografiyasini kengaytirish imkoniyatlarini izlashni uchrashuvlarning asosiy mavzusi deb atadi; u muzokaralar natijalariga aniqlik kiritmadi.