9-noyabrdan Qozogʻiston Oʻzbekiston bilan chegaradagi uchta oʻtkazish punktida navbat uchun garov joriy qiladi

Yangi tartib 2026-yil 9-noyabrdan «Qazigʻurt», «B. Qonisbayev» va «Atameken» oʻtkazish punktlarida kuchga kiradi. 20 oylik hisob-kitob koʻrsatkichi miqdoridagi summa 86 500 tengeni tashkil etadi, bu taxminan 2,3 mln soʻm. Slotni faqat ushbu mablagʻ tashuvchining maxsus elektron hisobvaragʻida mavjud boʻlsagina band qilish mumkin boʻladi. Yangilik haqidagi maʼlumotni Oʻzbekiston Transport vazirligi ham tarqatdi.

Avtomobil oʻtkazish punktiga belgilangan vaqtda yetib kelganida mablagʻlar toʻliq hajmda avtomatik ravishda qaytariladi. Agar tashuvchi 90 taqvim kuni davomida ketma-ket ikki marta band qilingan vaqtda kelmasa, garov qaytarilmaydi, pullar esa Qozogʻiston davlat byudjetiga tushadi. Idoraning soʻzlariga koʻra, bu chora soxta band qilishlar va oʻtish joylaridagi sunʼiy navbatlarning oldini olish hamda xalqaro tashuvchilarning masʼuliyatini oshirishga qaratilgan. Departament transport kompaniyalarini safarlarni oldindan rejalashtirishga va hisobvaraqda kerakli summa mavjudligini nazorat qilib borishga chaqirdi.

Kursiv Uzbekistanʼning aniqlik kiritishicha, band qilish CarGoRuqsat tizimida amalga oshiriladi. U yuk mashinalari, jumladan tirkamali mashinalar va egarli shatakchilar uchun moʻljallangan, yengil avtomobillar va avtobuslar uchun esa band qilish talab etilmaydi. Tizim Qozogʻistonning Oʻzbekiston, Xitoy, Turkmaniston, Rossiya va Qirgʻiziston bilan chegaralarida amal qiladi.