Toshkentda evakuatsiya qilish va jarima maydonchalari faoliyatining yangi tartibi tasdiqlandi

Hukumatning 508-sonli qarori 22-sentabr kuni qabul qilindi. Poytaxtdagi eksperiment 2026-yil 1-oktabrdan 2034-yil 31-dekabrgacha davom etadi. Barcha bosqichlar IIV Yoʻl harakati xavfsizligi xizmatining Yagona avtomatlashtirilgan axborot tizimidagi «Jarima maydonchasi» moduli orqali qayd etiladi.

Davlat organining ushlash toʻgʻrisidagi qaroridan soʻng bildirishnoma tegishli idoralarga hamda evakuator yoki kran-manipulyator yuboradigan xizmat koʻrsatuvchi kompaniyaga yuboriladi. Agar qoidabuzarlik boshqaruvdan chetlatishni nazarda tutsa, mashinani faqat maxsus transportda tashishga ruxsat beriladi. Avtomobilni haydovchining ishtirokisiz evakuatsiya qilish mumkin boʻladi. Shu bilan birga, agar haydovchi yuklash boshlangunga qadar yetib kelsa va qoidabuzarlikni bartaraf etsa, mashina olib ketilmaydi; agar yuklash boshlangan boʻlsa, evakuatsiya davom ettiriladi. Dala dalolatnomasi orqali topshirilgunga qadar mashina uchun vakolatli organ, maydonchaga joylashtirilgandan keyin esa xizmat koʻrsatuvchi tashkilot javobgar boʻladi.

Qaytarib berishga ruxsatnoma maʼmuriy ishni koʻrib chiquvchi organning mansabdor shaxsi tomonidan elektron tizim orqali QR-kod bilan bir ish kuni ichida rasmiylashtiriladi va haydovchiga SMS orqali yuboriladi. Bunday elektron hujjatsiz transportni berish taqiqlanadi. Mashinani olishdan oldin egasi evakuatsiya va saqlash uchun haq toʻlashi kerak. Saqlash muddati avtomobil evakuatorga yuklangan paytdan boshlab toʻliq sutkalarda hisoblanadi.

Jarima maydonchalari avtomobillarni kechayu kunduz, dam olish kunlarisiz qabul qilish va chiqarishga majbur boʻladi. Egalari tizim orqali mashinaning maydonchada turganini real vaqt rejimida kuzatish imkoniyatiga ega boʻladilar. Maydonchada olti oydan ortiq qolgan mashinalar talab qilib olinmagan transport reestriga kiritiladi. Jarima maydonchalari operatorlari idoralararo komissiya tomonidan ochiq tanlovlarda saralab olinadi.