IIV qoidalarni tasdiqladi: YHQ jarimalari boʻyicha qarz uchun mashina ushlab qolinishi mumkin

60 kunlik muddat qaror chiqarilgan kundan boshlab hisoblanadi. Shundan soʻng qarzdorning mashinasi haqidagi maʼlumotlar inspektorlarning planshetlarida paydo boʻladi va ushlab qolish uchun yangi bayonnoma tuzish talab etilmaydi: elektron tizim maʼlumotlari asos boʻladi. Haydovchi toʻxtatilgan joyning oʻzidayoq qarzni toʻlasa — mobil ilovada, elektron toʻlov tizimi orqali yoki bank kassasida — jarima maydonchasidan qutulib qolishi mumkin.

Yoʻriqnoma 2026-yil 5-noyabrdagi buyruq (roʻyxat raqami 3969) bilan tasdiqlangan boʻlib, 2011-yildan buyon amal qilib kelayotgan hujjatning oʻrnini egallaydi. Bayonnomalarni inspektorlar joyida planshetda «Maʼmuriy amaliyot» modulida rasmiylashtiradi, qoidabuzarning shaxsi biometriya boʻyicha aniqlanadi, bayonnoma esa elektron imzo yoki barmoq izi bilan tasdiqlanadi. Qogʻoz shakli ayrim holatlar uchun, masalan, huquqbuzar aybini rad etganida yoki aloqa boʻlmaganida qoldiriladi. Inspektorlarga joyida jarima toʻlovini qabul qilish taqiqlanadi.

Ishni koʻrib chiqish uchun 15 kun ajratiladi. Ish koʻrib chiqiladigan vaqt va joy haqida haydovchiga YIDXPʼdagi shaxsiy kabinet yoki mobil ilova orqali xabar beriladi. Qaror ustidan yuqori turuvchi organga yoki sudga 10 kun ichida shikoyat qilish mumkin.

Kameralar qayd etgan qoidabuzarliklar uchun mashina mulkdori javob beradi, takroriylik hisobga olinmaydi; agar maʼlumotlar markazga 48 soatdan kech tushsa, ish tugatiladi. Ayrim qoidabuzarliklar uchun ikki jarima balligacha hisoblanadi va ular bir yildan keyin bekor qilinadi. Bir yilda ballar yigʻindisi 12 balldan oshsa, ish avtomatik ravishda qoʻshimcha jazo chorasi masalasini hal qiladigan sudga yuboriladi.