Toshkentda BRT tasmalarining qurilishi sababli avtobuslar kechikmoqda

Toshkent shahar transport va yoʻl-transport infratuzilmasini rivojlantirish bosh boshqarmasi ijtimoiy tarmoqlardagi shahar aholisining murojaatlaridan soʻng mazkur izohni berdi. Hozirda Shahrisabz koʻchasi, Amir Temur shoxkoʻchasi va Yangi Sergeli koʻchasida alohida ajratilgan tasmalar qurilmoqda va mukammal taʼmirlanmoqda. Bu jami 5,09 kilometrni tashkil etadi.

Shahrisabz koʻchasida ishlar 1 kilometrni, Yangi Sergeli koʻchasida esa 1,36 kilometrni qamrab olgan. Amir Temur shoxkoʻchasida 2,73 kilometr masofa ikki bosqichda taʼmirlanmoqda: birinchi bosqichda 1,43 kilometr, ikkinchi bosqichda esa 1,3 kilometr.

Idora vakillarining soʻzlariga koʻra, uchastkalarning bir qismida harakat vaqtincha cheklangan boʻlib, bir qancha koʻchalarda tirbandliklar koʻpaygan. Bu holat ayniqsa ertalabki va kechki tigʻiz vaqtlarda sezilarli boʻlmoqda: qatnov zichligi tufayli avtobuslar doim ham jadvalga ulgurmayapti, qatnovlar orasidagi oraliq vaqt oshib bormoqda, yoʻlovchilar esa bekatlarda uzoqroq kutishga majbur boʻlmoqda.

Boshqarma ishlar yakunlanib, odatiy harakat tartibi tiklangach, tirbandliklar kamayishini va avtobuslar yana belgilangan jadval boʻyicha qatnay boshlashini kutmoqda. Idora ishlarning yakunlanish muddatini maʼlum qilmadi.