Oʻzbekiston Qozogʻiston va Xitoy bilan aviaqatnovlar limitini oshirishni kelishib oldi

Toshkent — Olmaota va Toshkent — Ostona yoʻnalishlari boʻyicha limit har birida haftasiga 42 tadan 60 tagacha qatnovga oshiriladi. Oʻzbekiston va Qozogʻiston oʻrtasidagi boshqa yoʻnalishlarda ruxsat etilgan chastota haftasiga 14 tadan 20 tagacha qatnovga yetadi. Xitoy bilan tomonlar muntazam qatnovlar sonini haftasiga 100 tadan 114 tagacha oshirishni kelishib oldi.

Aviatsiya maʼmuriyatlarining muzokaralari 3–5-noyabr kunlari Toshkentda fuqaro aviatsiyasi boʻyicha «Markaziy Osiyo — Xitoy» (C5+1) ishchi guruhining uchinchi yigʻilishi doirasida boʻlib oʻtdi. Qozogʻiston Transport vazirligi maʼlumotlariga koʻra, Oʻzbekiston-Qozogʻiston muzokaralariga Qozogʻiston Fuqaro aviatsiyasi qoʻmitasi raisi Saltanat Tompiyeva hamda Oʻzbekiston Transport vazirligi havo transporti boshqarmasi boshligʻi Jamoliddin Nazarov rahbarlik qildi. Yigʻilishda oltita davlat, jumladan, Qirgʻiziston, Tojikiston va Turkmanistonning aviatsiya maʼmuriyatlari hamda aviakompaniyalari ishtirok etdi. Unda «Havo Ipak yoʻli»ni tashkil etish toʻgʻrisidagi bitimni amalga oshirish, aviatashuvlar bozorini liberallashtirish, qonunchilikni uygʻunlashtirish va parvozlar xavfsizligi masalalari muhokama qilindi.

Gazeta.uzʼning eʼtibor qaratishicha, gap yangi parvozlar jadvali emas, balki ruxsat etilgan parvozlar soni haqida bormoqda: vazirlik yangi limitlar qachondan kuchga kirishi, qoʻshimcha chastotalarni qaysi tashuvchilar olishi va qaysi yoʻnalishlarda reyslar yoʻlga qoʻyilishiga aniqlik kiritmagan. Ishchi guruhning navbatdagi toʻrtinchi yigʻilishi 2027-yilda Qirgʻizistonda oʻtkazilishi rejalashtirilgan.