Oʻzbekistonda 2030-yildan elektr poyezdlari, shahar atrofi va shaharlararo avtobuslarda naqd toʻlovni bekor qilish taklif etildi

Ushbu chora 2030-yilgacha boʻlgan davrda ichki yoʻlovchi tashishni kompleks rivojlantirish strategiyasi loyihasida koʻzda tutilgan. Hujjatga muvofiq, hozirda mazkur yoʻnalishlardagi yoʻlovchilarning qariyb 70 foizi naqd pulda hisob-kitob qilmoqda. 2030-yilga kelib bu ulushni nolga tushirish rejalashtirilmoqda.

Yoʻlovchilarni elektron chiptalardan foydalanishga undash uchun loyihada 2027-yil 1-yanvardan 2029-yil 31-dekabrgacha oʻsha poyezdlar va avtobuslarda ular uchun kamida 20 foiz chegirma berish taklif qilinmoqda. Chora-tadbirlar rejasida chegirma boshlanishi boshqacha — 2027-yil 1-mart deb koʻrsatilgan. Tarif qoidalari, hisob-kitoblar tartibi va tashuvchilarga chegirmalarni kompensatsiya qilish mexanizmini tayyorlash Transport vazirligi, Iqtisodiyot va moliya vazirligi hamda «Oʻzbekiston temir yoʻllari» kompaniyasiga topshiriladi. Gazeta.uz eʼtibor qaratganidek, chora-tadbirlar dasturida chegirmalar qoʻshimcha moliyalashtirishni talab qilmasligi aytilgan, biroq tashuvchilarning yoʻqotishlari qaysi mablagʻlar hisobidan qoplanishiga hujjatda aniqlik kiritilmagan.

Taklif etilayotgan yana bir imtiyoz uzoq masofaga qatnovchi poyezdlarga elektron chipta egalariga tegishli: ularga asosiy poyezd joʻnashidan 12 soat oldin va yetib kelgandan keyin yarim sutka davomida tegishli hududdagi shahar atrofi elektr poyezdlarida bepul yurishga ruxsat berishmoqchi. Ushbu tartibni Transport vazirligi va «Oʻzbekiston temir yoʻllari» 2027-yil 1-sentabrgacha ishlab chiqishi va joriy etishi lozim.

Strategiyaning boshqa vazifalari qatoriga 2030-yilga borib ichki yoʻnalishlarda yillik yoʻlovchi oqimini 2 milliardga yetkazish va 2028-yilda «Bir yoʻl» yagona raqamli transport platformasini ishga tushirish kiradi. Loyiha yuzasidan eʼtiroz va takliflar 11-noyabrgacha qabul qilinadi.