Ilhom Idirov Toshkent shahar YHXB boshligʻi etib tayinlandi

Tayinlov haqida Toshkent shahar xalq deputatlari Kengashining 25-sentabrdagi qaroridan maʼlum boʻldi, unda Idirov idoraga berilgan topshiriqlar punktlarida koʻrsatilgan; shuningdek, maʼlumotni Yoʻl harakati xavfsizligi xizmati (YHXX) va Oʻzbekiston IIV tasdiqladi. U ushbu lavozimda Muhammad Odilovning oʻrnini egalladi. Podrobno.uz maʼlumotlariga koʻra, Idirov boshqarma boshligʻi vazifasini bajaruvchi etib tayinlangan.

Idirov muqaddam Qashqadaryo viloyati yoʻl harakati xavfsizligi boshqarmalariga rahbarlik qilgan, 2025-yil iyulidan Sirdaryo viloyati IIB YHXBni boshqargan, shuningdek, IIV YHXX markaziy apparatida rahbarlik lavozimlarida ishlagan.

Poytaxt Kengashining qarori 2026-yilning birinchi yarmida «Xavfsiz va ravon yoʻl» dasturini amalga oshirishga hamda yoʻl harakati xavfsizligiga bagʻishlangan. Hujjat poytaxt YHXBga yoʻl belgilarini almashtirish va oʻrnatishni, chiziqlar chizishni, svetofor obyektlari boʻyicha ishlarni hamda shaharga kirish joylari va chorrahalarda kuzatuv kameralarini oʻrnatishni jadallashtirishni topshiradi. Shuningdek, idoraga taʼlim tuzilmalari bilan birgalikda maktablar va bolalar bogʻchalarida ixtisoslashtirilgan sinflarni tashkil etish, bir hafta ichida poytaxt yoʻllarida oʻlim holatlarini kamaytirish boʻyicha manzilli reja tuzish hamda Xirmontepa, Mirzo Ulugʻbek va Sayram koʻchalarida harakatlanishni tashkil etish masalasini koʻrib chiqish buyurilgan.