Oʻzbekiston va Qirgʻiziston chegarasida yangi «Keskayor» chegara posti ochiladi

Davlat rahbarining soʻzlariga koʻra, uch oy muddatda obyekt loyihasini tayyorlash va uning qurilishini boshlash topshirildi. Hukumat hisob-kitoblariga koʻra, yangi punktning oʻtkazuvchanlik qobiliyati hozirgisidan ikki-uch baravar yuqori boʻladi, yuklar esa chegaradan taxminan bir hafta tezroq oʻtadi.

Yigʻilishda, shuningdek, 2027-yilda Toshkent — Andijon pulli avtomobil yoʻlini qurish boʻyicha amaliy ishlarni boshlash rejalari maʼlum qilindi. Bundan tashqari, Xonobod — Andijon yoʻnalishi boʻyicha uzunligi 78 kilometr boʻlgan yana bitta pulli trassa loyihalashtirilishini boshlash rejalashtirilmoqda.

Prezidentning baholashicha, Xitoy — Qirgʻiziston — Oʻzbekiston temiryoʻli ishga tushirilgach, mintaqa orqali yuk oqimi oʻn baravarga oshib, yiliga 15 mln tonnaga yetadi. Shu munosabat bilan yil oxirigacha Qoʻrgʻontepa tumani va Xonobod shahrida 300 gektar maydonda qiymati 600 mln dollarlik logistika majmuasi loyihasini amalga oshirishga kirishish topshirildi.