Buxoroning tarixiy markazida 1-oktabrdan samokat va rikshalar harakati cheklanadi

Cheklovlar Ark qalʼasidan Poyikalon majmuasi va Haqiqat koʻchasi orqali Labihovuz majmuasigacha boʻlgan hududni qamrab oladi. Taqiq va cheklovlar elektroskuterlar, elektrosamokatlar, mopedlar, rikshalar, kartinglar, toʻrt gʻildirakli velosipedlar va boshqa harakatlanish vositalariga, shuningdek, ot va tuyalarda yurishga taalluqlidir.

Shahar maʼmuriyati maʼlumotlariga koʻra, qaror yoʻlovchilarni tashish uchun moʻljallanmagan yoki qonunchilik talablariga javob bermaydigan harakatlanish vositalari sonining keskin koʻpayishi sababli qabul qilingan. Tartibsiz harakat turistlar va piyodalarning xavfsizligi hamda salomatligiga xavf tugʻdirgan, ayrim hollarda esa jarohatlanishlarga olib kelgan.

Tarixiy hududga kirish va chiqish joylarida axborot belgilari va stendlarini oʻrnatish topshirildi. Tartibga rioya etilishini nazorat qilish va tushuntirish ishlarini olib borish bilan ichki ishlar organlari, xavfsiz turizmni taʼminlash boʻlinmalari, soliq inspeksiyasi va madaniy meros boshqarmasi shugʻullanadi. Yoʻlovchilarni noqonuniy tashiganlik uchun javobgarlik koʻzda tutilgan, tadbirkorlarga esa ijarani boshqa zonalarga — xususan, “Yangi Oʻzbekiston” va “Boqiy Buxoro” bogʻlariga koʻchirish taklif etiladi.