Xiaomi 2026-yilda HyperOS 4 global talqini uchun 82 ta qurilma nomini maʼlum qildi

Dasturiy taʼminot uch bosqichda tarqatiladi. Noyabr oyi boshidan uni 33 ta qurilma, jumladan, Ultra modeli bilan birga Xiaomi 17 seriyasi, Xiaomi 15 va 15 Ultra, Redmi Note 15 va Note 17 smartfonlari, Poco F8 va X8, shuningdek Xiaomi Pad 8 va Pad 8 Pro planshetlari ola boshlaydi. Noyabr oyi oʻrtalaridan navbat 16 ta modelga, shu jumladan Xiaomi 15T va 15T Pro, Poco F7 va F9, Xiaomi Pad 7 hamda Redmi Pad 2 Proʼga yetib keladi. Dekabr bosqichiga esa yana 33 ta qurilma kiritilgan: Xiaomi MIX Flip, Xiaomi 13 va 14 ning turli talqinlari, jumladan T indeksli modellar, Redmi Note 14 turkumi, bir qator Poco smartfonlari hamda Xiaomi Pad 6S Pro 12.4 kabi planshetlar.

Kompaniya muddatlar taxminiy ekanidan hamda mintaqa, aloqa operatori va modelga bogʻliqligidan, yangilanishning oʻzi esa «havo orqali» asta-sekin yetib kelishidan ogohlantirmoqda. Yuklab olish hajmi ancha katta boʻlishi mumkin: Poco F8 Pro egasi barqaror HyperOS 3 talqinidan oʻtishda 8 GB dan ortiq maʼlumotni yuklab olishiga toʻgʻri keladi. Dekabrdan keyingi davr uchun rejalarini Xiaomi hozircha oshkor qilmadi.

HyperOS 4 tizimi Android 17 asosida yaratilgan boʻlib, uning beta-talqini avgust oyida paydo boʻlgan edi. Yangi tizimda Kod.ru nashri iOSʼdagi Liquid Glass uslubiga qiyoslayotgan interfeys qayta ishlangan, bloklash ekrani va ish stoli sozlamalari kengaytirilgan, suzuvchi oynalar takomillashtirilgan. Xiaomi maʼlumotlariga koʻra, bir sutkalik ishdan soʻng ilovalar qariyb 20% ga tezroq ochiladi — oʻrnatilgan sunʼiy intellekt tizimni foydalanuvchining odatlariga moslashtiradi.