Shermatov Oʻzbekistonning 27 mln nafar aholisi maʼlumotlari sizib chiqqanini tasdiqlamadi

Vazirning soʻzlariga koʻra, maʼlumotlar hozircha boshqa joyga tarqalmagani kelajak uchun hech narsani kafolatlamaydi. Uning hisoblashicha, sunʼiy intellektga kiritilayotgan investitsiyalar u bilan bogʻliq tahdidlardan himoyalanish xarajatlari bilan birga olib borilishi kerak: «Bunday xarajatlarni SI rivoji uchun maqsadsiz deb hisoblansa, xatarlar faqat oshib boradi».

«Odobli xakerlar» deb atalayotgan Butterfly guruhi avvalroq Shermatovning telefon raqami va JSHSHIRini eʼlon qilgan hamda 27 milliondan ortiq aholining maʼlumotlarini darknetga joylashtirish bilan tahdid qilgan edi. Keyinchalik guruh hech qanday maʼlumotni buzib kirmagani va sizdirmaganini, balki shunchaki shunday holat roʻy berishi mumkinligini koʻrsatmoqchi boʻlganini maʼlum qildi hamda davlat organlarining kiberxavfsizlik boʻyicha mutaxassislarini harakatsizlikda aybladi.

Shermatov sunʼiy intellekt eskirgan axborot tizimlaridagi zaifliklarni aniqlashni osonlashtirganini taʼkidladi: u eʼlon qilgan 2020-yildan beri maʼlumotlarga koʻra (grafik Gemini tomonidan tayyorlangan), aniqlanayotgan zaifliklar soni bir necha baravarga oshgan. U davlat, nodavlat va tijorat tashkilotlarini zaif nuqtalarni muntazam izlash hamda oʻz vaqtida bartaraf etishga, kiberhimoya uchun qoʻshimcha mablagʻ ajratishga, kadrlarni tayyorlashga va DXX Kiberxavfsizlik markazi hamda UzCERT xizmatining yangi zaifliklar haqidagi xabarlarini kuzatib borishga chaqirdi.

Misol tariqasida vazir yaqinda Binance kriptobirjasiga qilingan kiberhujumni eslatib oʻtdi; Kursiv yozishicha, birja 29-oktabr kungi hujum taxminan 6,34 mlrd dollarlik raqamli aktivlarga daxl qilganini tasdiqlagan. Shermatov kiberxavfsizlik boʻyicha mutaxassislarga boʻlgan talab oshishini kutmoqda va ushbu yoʻnalish rivojlantirilayotgan oliy oʻquv yurtlarini sanab oʻtdi: Cyber University, TATU, INHA, Amity va Acharya.