Sietlda Oʻzbekiston bosh konsulxonasi va WDTA SI boʻyicha memorandum imzoladi

Hujjat tajriba almashish hamda universitetlar, texnologiya kompaniyalari va davlat muassasalari oʻrtasida aloqalarni yoʻlga qoʻyishni nazarda tutadi. Tomonlar, shuningdek, taʼlim dasturlarini tayyorlash va Oʻzbekiston ishtirokida sinov loyihalarini amalga oshirish niyatida. SI masʼuliyatli qoʻllanilishi, kiberxavfsizlik va shaxsiy maʼlumotlarni himoya qilishga alohida eʼtibor qaratilgan.

Forum Seattle AI Weekʼning yakuniy tadbiri boʻldi. U bosh konsulxona, Amerika-Oʻzbekiston ishbilarmonlik va investitsiya kengashi, IT Park Uzbekistan hamda WDTA tomonidan tashkil etildi. Unda 60 ga yaqin kishi, jumladan, Microsoft va Meta mutaxassislari, Shimoli-sharqiy, Garvard va Vashington universitetlari vakillari, Sietl maʼmuriyati hamda investorlar ishtirok etdi.

Prezident administratsiyasi rahbari maslahatchisi, kengash kotibiyati rahbari Nozima Davletova mamlakatning raqamli rivojlanishdagi ustuvor yoʻnalishlari haqida soʻzlab berdi. Bosh konsul Ahror Burxanov AQSHning Tinch okeani shimoli-gʻarbi bilan aloqalar haqida gapirdi. IT Park Uzbekistan vakili Ruslan Yapparov yetakchi SI-kompaniyalari ishtirokida yoshlarni oʻqitish, hisoblash infratuzilmasi va oʻzbek startaplarining xorijga chiqishini ustuvor yoʻnalishlar sifatida qayd etdi.

Sietlning bosh texnologik direktori Shennon Smit shahar munitsipal xizmatlarda, qurilish jarayonlarida va yoʻllardagi xavfsizlikda SIdan qanday foydalanayotgani haqida soʻzlab berdi; Sietl va Toshkent oʻrtasida tajriba almashish muhokama qilindi. Ishtirokchilar agrotexnologiyalar, suvni tejash, til servislari va nogironligi boʻlgan shaxslar uchun yechimlarni istiqbolli yoʻnalishlar deb atadi.