Apple Xitoyda Apple Intelligence Qwen modeli bilan ishga tushirilishini eʼlon qildi

Dasturchilar uchun mazkur funksiyalarga ega iOS 27.3 sinov talqini chorshanba kuni, 4-noyabrda chiqadi. Xitoydagi barcha foydalanuvchilar uchun ular dekabr oyida iOS 27.3 yakuniy versiyasi bilan birga paydo boʻladi, kompaniya aniq sanani maʼlum qilmadi. iPhone 15 Pro va 15 Pro Max, iPhone 16 va undan keyingi modellar, shuningdek, iPhone Air hamda iPhone Duo qoʻllab-quvvatlanadi.

Alibaba bilan hamkorlik doirasida Qwen modeli Siriʼga, matn bilan ishlash vositalariga va «Vizual intellekt»ga xizmat koʻrsatadi. Uning yordamida Siri fotosuratlar, PDF-fayllar va taqdimotlar boʻyicha savollarni tahlil qila oladi, foydalanuvchilar esa matnlarni noldan yoza oladilar; buning uchun Qwen akkaunti yoki «Apple orqali kirish» tizimi orqali avtorizatsiyadan oʻtish talab etiladi. Qolgan funksiyalar, jumladan jonli tarjima (shuningdek AirPods orqali ham), Genmoji, kadrlardan ortiqcha obyektlarni olib tashlash, bildirishnomalar va xatlar jamlanmasi Appleʼning shaxsiy modellaridan foydalanadi. Tizimda va Siriʼda ingliz yoki soddalashtirilgan xitoy tilini tanlash zarur.

Yangi Siri AI va WWDC 2026ʼda namoyish etilgan boshqa imkoniyatlar, shuningdek Image Playground hozircha Xitoyga kirmaydi. Mac, iPad va boshqa qurilmalarda Apple Intelligence u yerda faqat regulyatorlarning ruxsatidan keyin paydo boʻladi, deya aniqlik kiritdi kompaniya.

Kod.ruʼning Bloombergʼga tayanib yozishicha, mamlakatda ishga tushirish jarayoni bir yildan ortiqroq vaqtga kechiktirildi: dastlab Apple 2025-yilning may oyini moʻljallagan edi, keyinchalik muddatlar 2025-yil oxiriga, soʻngra 2026-yil bahoriga koʻchirildi. Xizmat va xitoylik hamkorning modellari uchun maʼqullash 29-sentabr kuni olindi. Maʼqullashga erishish maqsadida kompaniyalar cheklovlarni, shu jumladan hukumatga model yangilanishlarini kelishish imkonini beruvchi filtrni kiritdilar.