Sem Altman uy kompyuterlaridagi xotirani resurslarning samarasiz sarflanishi deb atadi

Altman koʻpchilik lokal inferensga, yaʼni sunʼiy intellekt modellarini toʻgʻridan toʻgʻri oʻz kompyuterida ishga tushirishga umid bogʻlayotgani va ochiq modellar paydo boʻlishi bilan maʼlumotlar markazlari quvvatlariga ehtiyoj qolmaydi deb hisoblashini qayd etdi. Uning oʻzi esa bunday yondashuvga qoʻshilmaydi. «Global taqsimot nuqtayi nazaridan, har bir kishining kompyuterida dunyodagi cheklangan DRAM zaxiralarining bir qismi yotishi ancha dahshatli holat», — dedi OpenAI rahbari. Habr bayonida keltirilishicha, u shuningdek, foydalanuvchilarning mashinalarida bu xotira vaqtning atigi 5 foizida band boʻlishini qoʻshimcha qilgan.

Altmanning fikricha, chiplar yetishmovchiligi sharoitida uskunalarni maksimal darajada yuklash lozim, bunga esa faqat bulutda erishish mumkin. U koʻpchilik odamlarning ichki tuygʻusi buning aksini koʻrsatayotganini tan oldi.

Ushbu bayonot xotira narxlari oshishi fonida yangradi: Kod.ru maʼlumotlariga koʻra, ishlab chiqaruvchilar oʻz quvvatlarining borgan sari koʻproq qismini bulutli kompaniyalar shartnomalari hamda sunʼiy intellekt serverlariga ajratmoqda, SK Hynix esa avvalroq 2030-yilgacha taqchillik boʻlishi haqida ogohlantirgan edi. Habrʼdagi qayd muallifi eslatishicha, uning maʼlumotlariga koʻra, OpenAI Samsung va SK Hynixʼga dunyoda ishlab chiqariladigan DRAMʼning 40 foiziga buyurtma bergan, shundan soʻng xotiraning kontrakt narxlari 171 foizga oshgan.

Altmanning soʻzlari geymerlar va kompyuter yigʻuvchilar orasida tanqidga uchradi. Reddit foydalanuvchilari kompyuterlar oʻyinlar, videomontaj hamda oylik obunasiz ishlaydigan dasturlar uchun sotib olinishini yozishgan.