«Oʻzbekiston — Avstriya» forumi: IT Park eksport modeli haqida soʻzlab berdi

Taqdimot bilan IT Parkʼning eksportni rivojlantirish boʻyicha direktori Jahongir Kagirov soʻzga chiqdi. U Oʻzbekistonning xalqaro texnologiyalar va biznes-xizmatlar bozoriga kirish imkoniyatlari, shuningdek, eksport loyihalarini malakali mutaxassislar bilan taʼminlash, infratuzilmani rivojlantirish va xorijiy kompaniyalarni qoʻllab-quvvatlash mexanizmlari haqida soʻzladi. Forum mehmonlariga qanday shartlar asosida IT Park rezidenti boʻlish mumkinligi, hozirda qanday soliq imtiyozlari amal qilayotgani va mamlakatda IT-faoliyatni qanday olib borish lozimligi tushuntirildi.

Forumda Investitsiyalar, sanoat va savdo vazirligi, Xorijiy investitsiyalarni jalb etish agentligi, BrainsToVentures, ecotel communication, Tele Columbus, GOODRAM/Wilk Elektronik kompaniyalari hamda Global Neighbours xalqaro tashkiloti vakillari ishtirok etdi. Dastur sohaviy taqdimotlar, shuningdek, B2B va G2B formatidagi muzokaralardan iborat boʻldi.

Ishtirokchilar Avstriya kompaniyalarining Oʻzbekiston hududidagi loyihalarda ishtirok etishi va oʻzbekistonlik raqamli yechimlar yetkazib beruvchilarining Yevropadagi buyurtmachilar bilan ish faoliyatini kengaytirish istiqbollarini muhokama qildilar. OʻzA xabariga koʻra, tomonlar texnologik hamkorlikni rivojlantirishdan oʻzaro manfaatdor ekanini taʼkidladilar.