Fransiya deputatlari internet-kompaniyalardan trafik uchun yigʻim undirishni qoʻllab-quvvatladi

Tuzatishni 11 deputat qoʻllab-quvvatladi, 10 nafari qarshi chiqdi, yana 14 nafari betaraf qoldi. Avvalroq shunga oʻxshash taklif moliya komissiyasidan oʻtmagan edi. Yigʻim hozircha kuchga kirmadi: chora Fransiya 2027-yilgi byudjetini koʻrib chiqishning qolgan bosqichlaridan oʻtishi kerak.

Yigʻimni kontent va raqamli xizmatlar koʻrsatuvchilari toʻlashi taklif etilmoqda. Ular orasida Google, Meta, Amazon, Netflix, Akamai va oʻyin platformalari qayd etilgan. Yuklab olingan gigabaytlar uchun isteʼmolchilardan toʻlov undirish rejalashtirilmagan. Trafik hajmini hisobga olish Fransiya provayderlariga topshiriladi: ular har chorakda soliq xizmatiga qaysi kompaniya qancha miqdorda maʼlumot yuborgani haqida xabar berib boradi. Uzatilayotgan maʼlumotlarning mazmuni va qabul qiluvchilar haqidagi maʼlumotlarni yigʻish koʻzda tutilmagan. Yigʻim summasi kompaniyaning Fransiyadagi aylanmasining 15%i yoki uning umumiy aylanmasining 2%i bilan cheklangan; iXBT.com maʼlumotlariga koʻra, bu ikki qiymatdan kattarogʻi qoʻllanadi.

Tuzatish mualliflari Fransiyaning Arcep regulyatori maʼlumotlariga tayanmoqda: mamlakatdagi foydalanuvchilar bir yilda 200 mlrd GB ga yaqin maʼlumot oladi, ularning qariyb yarmi Google, Meta, Amazon va Netflix hissasiga toʻgʻri keladi. Ularning baholashicha, yigʻim byudjetga yiliga taxminan €10 mlrd keltirishi mumkin. Tuzatish kompaniyalarni xarajatlarni mijozlar zimmasiga yuklashga majburlamaydi, biroq ularning narxlarni oshirishini ham taqiqlamaydi.