Xitoyning Phantom Blade Zero jangari oʻyini 4 mln nusxadan ortiq adadda sotildi

Mustaqil studiya ushbu muvaffaqiyat haqida oʻyinning rasmiy mikroblogida eʼlon qildi. Nashrda ishlab chiquvchilar oʻyinchilarga minnatdorlik bildirdi: «Barcha mehringiz va qoʻllab-quvvatlaganingiz uchun chin qalbimizdan rahmat!» Oʻyin 29-oktabr kuni PC, Steam va Epic Games Storeʼda, shuningdek, PS5ʼda sotuvga chiqdi.

3DNews qayd etishicha, chiqarilgan kuni Steamʼda oʻyinda bir vaqtning oʻzida 723 mingdan ortiq kishi boʻlgan va loyiha xizmatning xalqaro sotuvlar jadvalida birinchi oʻrinni egallagan. Keyinchalik pik onlayn koʻrsatkichi 833,9 mingtaga koʻtarildi, bu Steamʼning umumiy reytingidagi 14-oʻringa toʻgʻri keladi. Dastlabki kunlarda foydalanuvchilarning ijobiy sharhlari ulushi 79 foizdan 89 foizgacha oʻsdi.

Voqealar kung-fu va stimpankni birlashtirgan kung-fu-pank settingida boʻlib oʻtadi. Bosh qahramon — «Orden» tashkilotining elita qotili Soul, uning patriarxi oʻlimida nohaq ayblanadi va 66 kun ichida oʻzidan ayblovni olib tashlashi kerak.

Oʻyin Unreal Engine 5 negizida yaratilgan. iXBT.com TechPowerUpʼga tayanib xabar berishicha, nashr unda 35 ta videokartani tekshirgan. Upskalerlarsiz maksimal sozlamalarda sekundiga 60 kadr uchun Full HDʼda RTX 5060 Ti darajasidagi karta yetarli, 1440pʼda RTX 4070 Tiʼdan past boʻlmagan karta talab etiladi, 4Kʼda esa bunday natijani faqat RTX 5090 koʻrsatadi. Nurlar trayssirovkasi unumdorlikni taxminan 20–25 foizga pasaytiradi.