Google Androidʼdan Windowsʼga suratlarni nusxalash funksiyasini joriy qila boshladi

Yangi imkoniyat Google Play tizim servislarining noyabr oyidagi yangilanishi bilan birga paydo boʻldi. U yoqilgach, telefondagi fotosuratlar va roliklar shaxsiy kompyuterga oʻz-oʻzidan nusxalanadi. Fayllar toʻgʻridan-toʻgʻri qurilmadan qurilmaga oʻtadi, shuning uchun bunga internet talab qilinmaydi.

Nusxalashni sozlash uchun kompyuterga Windows uchun moʻljallangan Quick Shareʼning eng soʻnggi versiyasi oʻrnatiladi va telefondagi ayni bir xil Google akkauntiga kiriladi, soʻng ilova sozlamalarida mazkur parametr yoqiladi. Dastur 64-bitli Windows 10 va undan yangiroq versiyalarda ishlaydi, ARM protsessorli kompyuterlarda esa Windows 11 kerak boʻladi. Smartfon Android 6 yoki undan yangi tizimda ishlashi zarur. Har ikkala qurilmada Bluetooth, shuningdek Wi-Fi yoki Ethernet yoqilishi lozim. Google telefon va kompyuter bir-biridan uzogʻi bilan besh metr masofada boʻlishini maslahat beradi.

Bundan tashqari, Android Dev Summit 2026 anjumanida Google Quick Share SDKʼni — begona dasturchilar oʻz ilovalariga fayl uzatishni joriy etishlari mumkin boʻlgan vositalar toʻplamini taqdim etdi. Hozirda buning uchun «Ulashish» tizim menyusini ochish va Quick Shareʼning alohida interfeysiga oʻtish kerak boʻladi; SDK bilan esa ilovada fayllar prevyusi koʻrinib turadigan pastki panel paydo boʻladi. Chiqarilish 2027-yilning birinchi yarmiga rejalashtirilgan, iOS uchun alohida versiya chiqadi. Afzalliklar qatorida kompaniya uchma-uch shifrlash, foto va videolarni siqmasdan uzatish hamda internetsiz va mobil tarmoqsiz ishlashni sanab oʻtgan.