Google va hamkorlari 1,3 milliondan ortiq Android qurilmasidan iborat botnetni yoʻq qildi

Google Threat Intelligence Group baholashicha, XCPE bekdori va uning asosida qurilgan botnetni daromad olish maqsadida Shenchjendagi Xitoy ishlab chiqaruvchisi Videostrong Technology yaratgan va ekspluatatsiya qilgan boʻlish ehtimoli yuqori. Google talqiniga koʻra, kompaniya yashirin kirish kanalini dasturiy taʼminotga (proshivka) hali ishlab chiqarish jarayonidayoq oʻrnatgan va texnikaga kirish huquqini begona operatorlarga sotgan. Zararlangan qurilmalar reklama firibgarligi uchun, proksi-tarmoqlar tugunlari sifatida hamda qoʻshimcha zararli dasturlarni oʻrnatish uchun ishlatilgan.

Operatsiyada Googleʼdan tashqari Yaponiya Milliy politsiya agentligi hamda Lumen, Human Security, Plume, Synthient va TrendAI kompaniyalari ishtirok etdi. «Xabr»ning The Register nashriga tayanib yozishicha, tarmoq 200 dan ortiq mamlakatdagi qurilmalarni qamrab olgan. TrendAI 2026-yil 3-iyundan 1-oktabrgacha boʻlgan davrda operatsiyaga aloqador boʻlgan 3,8 milliondan ortiq noyob uy va mobil IP-manzillarini qayd etdi. Koalitsiya, shuningdek, botnet hamkorlarining boshqaruv domenlarini ham uzib qoʻydi; Google bu chora operatorlarni yana kamida 10 million xavf ostida qolgan qurilmaga kirish imkoniyatidan mahrum qiladi deb hisoblamoqda.

Google Videostrong bilan aloqalarni uzdi, undan Google servislari oldindan oʻrnatilgan Android TV qurilmalarini chiqarish litsenziyasini qaytarib oldi hamda kompaniya va unga aloqador tuzilmalarga sertifikatlangan Android qurilmalarini ishlab chiqarishni va ular uchun dasturiy taʼminot yetkazib berishni taqiqladi.