OpenAI Images 2.6ʼni chiqardi: ChatGPT GIF-animatsiyalar yaratishni oʻrgandi

Animatsiyani matnli tavsif asosida yoki yuklangan tasvirga tayanib olish mumkin. Masalan, chizilgan qahramondan qoʻl silkitishni soʻrash mumkin. Tayyor GIFʼning ijro tezligi oʻzgaradi, faylni esa ulashish mumkin. Kod.ru nashrining The Vergeʼga tayanib xabar berishicha, alohida kadrlarni koʻrish va tahrirlash imkoniyati ham mavjud. Foydalanuvchining oʻzi yuklagan animatsiyali GIFʼlarni servis hozircha tahrirlamaydi: bu funksiya faqat ChatGPTʼda yaratilgan animatsiyalar uchun ishlaydi.

OpenAIʼning bayonotiga koʻra, Images 2.6 avvalgi talqinga nisbatan qariyb 50 foizga tezroq ishlaydi. Ketma-ket tahrirlash jarayonida model qahramonlarning tashqi koʻrinishini, tovarlar detallarini va brending elementlarini yaxshiroq saqlab qoladi. Saqlangan referenslar ham paydo boʻldi: yuklangan suratni nom bilan saqlab, keyinchalik qayta yuklamasdan boshqa chatlarda foydalanish mumkin. Kompaniya maʼlumotlariga koʻra, ChatGPT va API foydalanuvchilari ayni paytda haftasiga 4 milliarddan ortiq tasvir generatsiya qilmoqda, sentabr oyida esa bu koʻrsatkich 3 milliardni tashkil etgan edi.

Dasturchilar uchun APIʼda ikkita model taqdim etildi. GPT-Image-2.6 Flare tezlikka, GPT-Image-2.6 Sunburst esa tahrirlash vaqtida sifat va detallarning barqarorligiga moʻljallangan. Bundan tashqari, aniq tahrirlar uchun tasvir sohalarini belgilash, SVG formatiga eksport qilish va generatsiya murakkabligini sozlash imkoniyatlari qoʻshildi.