Janubiy Koreyada Samsung muzlatkichlari dasturiy taʼminot yangilanishidan soʻng ishdan chiqdi

Nosozlik 22-sentabr kuni boshlandi. Texnika egalari yangilanish oʻrnatilgandan soʻng qurilmalar qotib qolayotgani, buyruqlarga javob bermayotgani, ularning ichki chirogʻi oʻchib qolayotgani yoki sovuq havo berish toʻxtayotganidan shikoyat qildilar. Qurilmani elektr tarmogʻidan uzish orqali qayta yuklash uning ish faoliyatini tiklamadi. Muammo asosan 2024-yildan buyon chiqarilgan Bespoke AI 4-Door modellariga, jumladan RM70F va RM80F modellariga taʼsir koʻrsatdi.

Samsung Electronics mazkur hodisaga ichki sinovlar uchun moʻljallangan faylning foydalanuvchilarga yuborilishi sabab boʻlganini maʼlum qildi. Ishlab chiqaruvchi nosozlik apparat taʼminotidagi nuqson yoki SmartThings platformasidagi nosozliklar bilan bogʻliq emasligini taʼkidladi.

Kompaniya uzr soʻradi va muzlatkichlarni masofadan turib tuzatish imkonsiz boʻlgani sababli mutaxassislarni chaqirish uchun servis markazlariga murojaat qilishni tavsiya etdi. Samsung shoshilinch taʼmirlash guruhini tashkil etdi va baʼzi muhandislarni navbatchilikda qoldirdi, chunki nosozlik aholi mahsulotlar sotib olgan Chxusok milliy bayrami arafasida yuz berdi. Ishdan chiqqan qurilmalarning aniq soni hozircha oshkor etilmayapti.