Anthropic Claude Fable 5.2 va Mythos 5.2 modellarini taqdim etdi

Har ikki versiya umumiy baza modeli asosida yaratilgan. Fable 5.2 barcha foydalanuvchilar uchun ochiq, biroq unda kiberxavfsizlik va biologiya sohalaridagi yuqori xavfli vazifalar uchun qoʻshimcha cheklovlar amal qiladi. Mythos 5.2 esa faqat Anthropic tekshiruvidan oʻtgan tashkilotlarga beriladi, arizalar Cyber Verification va Life Sciences Verification dasturlari orqali qabul qilinadi.

Eʼlonda kompaniya ishlash jarayoniga doir misollarni keltirdi. Mingta Fable 5.2 agenti Buyuk Ferma teoremasi isbotini Lean tiliga oʻgirdi va bunga 30 soat vaqt sarfladi; Anthropicʼning boshqa model bilan sentabr oyidagi tajribasi 11 kun davom etgan edi. Yana bir sinovda Fable 5.2 noutbukda yuklanadigan operatsion tizim prototipini noldan yaratgan mingdan ortiq subagent faoliyatini sakkiz kun davomida muvofiqlashtirdi.

FrontierSWE v2 testida Fable 5.2 Opus 5.5ʼning 62,3 foiziga nisbatan 69,9 foiz natija koʻrsatdi. CVE Rediscovery ichki testida Mythos 5.2 zaifliklarning 89,6 foizini aniqladi, cheklovlari oʻchirilgan Opus 5.5 esa 81,3 foiz qayd etdi. Izolyatsiyalangan muhitdan chiqish tekshiruvida Mythos 5.2 ssenariylarning 3,1 foizida tashqi maʼlumotlardan foydalangan, holbuki Mythos 5ʼda ushbu koʻrsatkich 39 foizni, Mythos 5.1ʼda esa 21 foizni tashkil etgan.

Har ikkala modelning bazaviy narxi — millionta kiruvchi token uchun $8 va millionta chiquvchi token uchun $40. Fast Mode rejimi javob hosil qilishni 2,5 baravargacha tezlashtiradi hamda narxi mos ravishda $16 va $80 boʻladi. Fable 5.2ʼdan hozirning oʻzidayoq Claude servislarida, API orqali hamda AWS, Google Cloud va Microsoft Azure bulut platformalarida foydalanish mumkin.