FAA disketalarda ishlaydigan dispetcherlik tizimlarini almashtirishni boshlamoqda

Idora maʼlumotlariga koʻra, eskirgan tizimlar meteorologik hamda aviadispetcherlar uchun oʻta muhim boʻlgan boshqa maʼlumotlarni oʻz ichiga oladi va mamlakatdagi 400 dan ortiq obyektda ishlab kelmoqda. Ularning oʻrnini Enterprise Information Display System (E-IDS) egallaydi. Bu ishchi maʼlumotlar, yangilanishlar va bildirishnomalarni bitta ekranga chiqaradigan raqamli platformadir. The Registerʼga tayanib 3DNews xabar berishicha, u toʻrtta tizimni, shu jumladan Information Display System 4 va En Route Information Display System (ERIDS) tizimlarini almashtiradi. FAA tizimga oʻtish dispetcherlarning axborotdan foydalanishini tezlashtiradi, texnik xizmat koʻrsatish xarajatlarini kamaytiradi va parvozlar xavfsizligini oshiradi deb kutmoqda.

E-IDS uchun tajriba maydonchalari sifatida beshta obyekt tanlandi: Neshvill, Rochester va Atlantik-Siti xalqaro aeroportlari, shuningdek FAAʼning Solt-Leyk-Siti hamda Atlantadagi maʼlumotlar markazlari. FAA rahbari Brayan Bedford modernizatsiyaning maqsadi sifatida eskirgan qoʻlda bajariladigan jarayonlardan voz kechish va muhim bildirishnomalarni tezroq tarqatishni maʼlum qildi.

The Register maʼlumotlariga koʻra, Bedford modernizatsiyani davom ettirish uchun 30 mlrd dollar ajratishni nazarda tutuvchi Modern Skies Act qonunini qabul qilish zarurligini ham bildirgan. Big Beautiful Bill qonuni FAA uchun 12,5 mlrd dollar koʻzda tutadi. AQSh Bosh nazorat-moliya boshqarmasi (GAO) sentabr oyida maʼmuriyatning moliyaviy ehtiyojlari toʻliq qoplanmayotganini koʻrsatib oʻtdi: modernizatsiyaning ikkinchi bosqichi uchun qoʻshimcha ravishda 10,2 mlrd dollar talab etiladi, uning yakunlanish muddatlari esa hozircha belgilanmagan.