Sony sunʼiy intellekt yordamida PlayStationʼni avtomatik taʼmirlash tizimini patentladi

Patent hujjatlariga koʻra, SI-server ulangan qurilmalarni kuzatishi va kelib tushayotgan diagnostika maʼlumotlarini tahlil qilishi kerak. Nosozlik aniqlanganda tizim proshivkani tekshirish yoki tuzatish uchun tezda shaxsiy dasturiy kod yaratishga hamda foydalanuvchining qoʻllab-quvvatlash xizmatiga murojaat qilishi zaruratisiz uni konsolga yuborishga qodir boʻladi. Agar avtomatik bartaraf etishning imkoni boʻlmasa, hisobot kompaniya muhandislariga yoʻnaltiriladi.

Hujjatlarda taʼkidlanishicha, taklif etilgan yondashuv kafolat boʻyicha murojaatlar sonini va servis xizmatiga tushadigan yuklamani kamaytirishga qaratilgan. Shuningdek, patent ushbu tizimni Sony brendining boshqa qurilmalari, jumladan televizorlar, kameralar va quloqchinlar uchun ham qoʻllash imkonini beradi.

Shu bilan birga, Sonyʼning toʻlov vositachisi vazifasini bajaruvchi oʻyin kontrolleri boʻyicha patent arizasi eʼlon qilingani maʼlum boʻldi. Texnologiya karta maʼlumotlarini qoʻlda kiritmasdan raqamli doʻkondan oʻyinlar va qoʻshimchalarni sotib olish uchun yaqin atrofdagi smartfondan toʻlov rekvizitlarini olishni tavsiflaydi.

Patent arizalarining topshirilgani va roʻyxatdan oʻtkazilgani kompaniyaning ushbu funksiyalarni mavjud yoki boʻlajak qurilmalarda joriy etish niyatida ekanini tasdiqlamaydi.