Tramp AQSHda “Sunʼiy intellekt kuchlari” tashkil etilishini eʼlon qildi

Tramp oʻz tashabbusi haqida Truth Social ijtimoiy tarmogʻida maʼlum qilib, boʻlgʻusi tuzilmani birinchi prezidentlik muddati davrida tashkil etilgan AQSH Koinot kuchlari bilan qiyosladi. Shu bilan birga, Amerika prezidenti tashkilotning tuzilishi, byudjeti, aniq vazifalari va ishga tushirilishining aniq muddatlari haqida maʼlumot keltirmadi hamda rahbarning ismi keyinroq eʼlon qilinishini qayd etdi.

Oq uy rahbari maʼmuriyat sunʼiy intellekt texnologiyalarining rivojlanishini jilovlash niyatida emasligini bildirdi va ushbu yoʻnalishni istiqbolda Amerika YaIMning 25% igacha taʼminlashga qodir navbatdagi sanoat inqilobi deb atadi. Tramp texnologik sohada AQSHning Xitoy ustidan ustunligini saqlab qolish muhimligini taʼkidladi va suiisteʼmolliklarga qarshi kurashish uchun yangi cheklovlar kiritmasdan, jinoyat va fuqarolik huquqining amaldagi meʼyorlari yetarli ekanini qoʻshimcha qildi.

Avvalroq maʼmuriyatda “SI podshosi” deb ataluvchi lavozimni venchur investori Devid Saks egallagan boʻlib, u keyinchalik maslahatchi maqomiga oʻtgan edi. Yangi bayonotlar Trampning Xitoy Xalq Respublikasi Raisi Si Szinpin bilan muzokaralarga tayyorgarligi fonida yangradi, ushbu muzokaralar kun tartibiga sunʼiy intellektdan foydalanish xavfsizligi masalalari ham kiritilgan.