Rossiyada iPhone 16 va 17 narxlari oshishi mumkinligi haqida ogohlantirildi

Ritelchilar maʼlumotiga koʻra, yangi turkumlar chiqqandan soʻng eski qurilmalarning anʼanaviy arzonlashuvi bu gal kutilmayapti. Bunga rublning zaiflashishi, logistikaning qimmatlashishi, xarid narxlarining oʻsishi hamda Appleʼning oʻzi tomonidan avvalgi avlod smartfonlari narxining 100 dollarga koʻtarilishi sabab qilib koʻrsatilmoqda.

«Citilink» kompaniyasi iPhone 16 va 17 narxi 10% va undan koʻproqqa qimmatlashishini prognoz qilmoqda hamda asosiy sakrashni avvalroq xarid qilingan partiyalar tugaydigan oktyabr oyi bilan bogʻlamoqda. Shu bilan birga, «M.Video»da shakllantirilgan qurilmalar zaxirasi narxlarni vaqtincha ushlab turadi deb hisoblashmoqda, DNS esa hozircha eski modellar narxining oshishi qayd etilmaganini maʼlum qildi. Mobile Research Group tahlilchisi Eldar Murtazin Rossiyadagi iPhone 16 va iPhone 17 turkumlarining joriy ombor zaxiralarini 300–400 ming dona deb baholab, yuqori raqobat va past talab yil oxirigacha narxlar oshishiga toʻsqinlik qilishi mumkinligini taʼkidladi.

Shu bilan birga, ayrim maydonchalarda qimmatlashuv allaqachon qayd etilgan. «Yandeks Market» maʼlumotlariga koʻra, 7-sentabrdan 13-sentabrgacha boʻlgan davrda iPhone 17 Pro Max narxi oʻrtacha 10% ga, iPhone 17 Pro va 16 Pro Max esa 5% dan qimmatlashdi. Bir vaqtning oʻzida «Avito» platformasida sentabrning birinchi haftasida talabning keskin oʻsishi qayd etildi: 256 GB xotiraga ega iPhone 17 Pro uchun soʻrovlar soni 5,8 baravarga oshdi.