Hindiston TIV Oʻzbekistondagi hindistonlik tibbiyot talabalarining oʻqishiga qoʻyiladigan talablar haqida maʼlum qildi

Mazkur bayonot Nyu-Dehlidagi navbatdagi brifingda yangradi. Jaysval Oʻzbekistonda MBBS tibbiyot dasturlariga oʻqishga kirayotgan Hindiston fuqarolari soni kamaygani haqidagi savolga javob berdi. Uning soʻzlariga koʻra, Hindiston tomoni oʻz fuqarolarining taʼlim olishi, jumladan tibbiyot mutaxassisliklari boʻyicha oʻqishi masalalarida Oʻzbekiston rasmiylari bilan aloqada boʻlib turibdi.

TIV vakili boʻlgʻusi talabalarga Hindistonning Toshkentdagi elchixonasi hamda NMC tushuntirishlarini oʻrganib chiqishni tavsiya qildi. Ushbu tavsiyalar nafaqat Oʻzbekistonda, balki boshqa mamlakatlarda ham shifokorlikka oʻqishga taalluqlidir. Shuningdek, Jaysval Hindiston hukumati talabalarni Hindistonning oʻzida ham, undan tashqarida ham vijdonsiz vositachilardan himoya qilishga intilayotganini taʼkidladi.

NMC Oʻzbekistonda tayanch tibbiy maʼlumot olishni rejalashtirayotgan hindistonlik abituriyentlar uchun oʻz tavsiyalarini aprel oyida eʼlon qilgan edi. Komissiya Hindiston fuqarolarining bir qismi xorijdagi xususiy tibbiyot kollejlariga oʻqishga kirayotgani, ulardagi dasturlar va taʼlim sharoitlari Hindiston talablariga mos kelmasligini qayd etgan hamda oliygoh maqomini oldindan tekshirishga va ruxsati boʻlmagan muassasalarga bormaslikka chaqirgan edi.

NMC maʼlumotlariga koʻra, talablarga rioya qilmaslik Hindistonda tibbiy malakani roʻyxatdan oʻtkazishning rad etilishiga olib kelishi mumkin. Komissiya mezonlar qatorida oʻqish muddati, taʼlim tili, dastur mazmuni, klinik tayyorgarlik hajmi hamda internatura yoki klinik amaliyot shartlarini keltirib oʻtgan.