PA rahbari Saida Mirziyoyeva Qarshidagi avariya holatidagi bogʻcha va maktabni koʻzdan kechirdi

Mirziyoyevaning soʻzlariga koʻra, maktabgacha taʼlim muassasasi binosi avariya holatida, maktab sinflari sovuq, partalar esa allaqachon eskirgan. «Bolalik kutib turmaydi, shuning uchun bu muammolarni kechiktirmasdan hal qilishimiz shart», — dedi PA rahbari.

Bolalar bogʻchasining yangi binosi 360 nafar tarbiyalanuvchiga moʻljallanadi. 43-sonli maktabni nafaqat taʼmirlash, balki unda zamonaviy laboratoriyalar jihozlash, ijodiy toʻgaraklar yoʻlga qoʻyish hamda alohida ehtiyojli oʻquvchilar uchun inklyuziv muhit yaratish vaʼda qilindi. Ishlarning muddatlari va qiymati maʼlum qilinmagan.

Safar davomida Mirziyoyeva yangi Qashqadaryo ilgʻor kasbiy mahorat texnikumiga ham tashrif buyurdi. U texnikum oʻquvchilari kelajakka ishonch bilan qarayotganini taʼkidladi. «Bizning bosh maqsadimiz — bogʻchadagi ilk qadamlardan tortib, to mustaqil hayotga qadam qoʻygunga qadar barcha farzandlarimiz chinakam munosib sharoitlarda oʻsib-ulgʻayishi va taʼlim olishiga erishish», — dedi Prezident administratsiyasi rahbari.