Munira Aminova Fanlar akademiyasi huzuridagi OAK raisi etib tayinlandi

Yangi tayinlovga qadar Aminova Toshkentdagi Xalqaro qishloq xoʻjaligi universiteti rektori boʻlgan. Mazkur oliy taʼlim muassasasi 2022-yilda Buyuk Britaniyaning Qirollik qishloq xoʻjaligi universiteti bilan hamkorlikda ochilgan edi. Bundan tashqari, u 2024-yildan buyon tashqi ishlar vaziri maslahatchisi lavozimida ishlab kelayotgan edi.

Aminova turli yillarda Moliya vazirligi, Toshkent shahridagi Xalqaro Vestminster universiteti, BMT va Bryusseldagi Xalqaro maʼmuriy fanlar institutida faoliyat yuritgan, Yevropa Ittifoqi dasturlarida ishtirok etgan. U Toshkent davlat texnika universiteti, Buyuk Britaniyadagi Birmingem universiteti va Bryussel erkin universitetida (Vrije Universiteit Brussel) tahsil olgan.

May oyida OAK islohoti prezident Shavkat Mirziyoyev huzuridagi yigʻilishda muhokama qilingan, oʻshanda komissiyaning Fanlar akademiyasi tizimiga oʻtkazilishi eʼlon qilingan edi. Ilgari u hozirda tugatilgan Oliy taʼlim vazirligi tasarrufida boʻlgan. Koʻp oʻtmay, hukumat komissiyaga 10 yildan ortiq rahbarlik qilgan Ahmadbek Yusupovni lavozimidan ozod etdi.

Oʻsha paytda prezident yangi avlod ilmiy kadrlarini tayyorlash va attestatsiyadan oʻtkazishga bagʻishlangan farmonni imzoladi. Hujjatda tayyorlashning 7 ta ustuvor yoʻnalishi tasdiqlandi, ilmiy kengashlar faoliyatini reyting asosida baholash joriy etildi va OAK oʻz vazifalarini mustaqil ravishda bajarishi belgilab qoʻyildi.