Ona tili boʻyicha milliy sertifikat: imtihonlar amaldagi alifboda oʻtkaziladi

Agentlik maʼlumotlariga koʻra, barcha test topshiriqlari amaldagi lotin alifbosida tuzilgan. Ishtirokchilar ochiq savollarga javob berishda va yozma ishlarda, shu jumladan esseda ham undan foydalanishlari lozim. Imtihonlar Oʻzbekistonning barcha hududlarida boʻlib oʻtadi.

Alifboga kiritilgan oʻzgartirishlarni Prezident Shavkat Mirziyoyev 21-oktabr kuni tasdiqladi. Qonunga muvofiq, yangilangan yozuv olti oydan keyin kuchga kiradi, shu sababli u yaqin kunlardagi imtihonlarda qoʻllanilmaydi. Agentlik ishtirokchilarni tayyorgarlik koʻrish va topshirish jarayonida buni inobatga olishga chaqirdi.

Oʻzgarishlarga koʻra, Oʻ va Gʻ oʻrniga Ö ö va Ğ ğ, Sh va Ch harf birikmalari oʻrniga esa Ş ş va Ç ç yoziladi. Yangi yozuvga bosqichma-bosqich oʻtiladi: maktab darsliklarini oʻtkazish 2027-yilda boshlanadi, barcha sinflarda uni yakunlash esa 2031-yilga qadar rejalashtirilgan.