Shahlo Turdiqulova 2027–2028-yillarga TWAS vitse-prezidenti etib saylandi

TWASda u 2027–2028-yillarda Markaziy va Janubiy Osiyo nomidan vakillik qiladi va oʻz vazifasini bajarishga 2027-yil 1-yanvardan kirishadi. Qaror akademiya aʼzolari tomonidan ovoz berish yoʻli bilan qabul qilindi. Turdiqulova tashkilot mavjud boʻlgan davr mobaynida uning rahbariyatiga kirgan Oʻzbekistondan va butun Markaziy Osiyo mintaqasidan birinchi olim boʻldi.

Yangi tarkibdagi TWAS Kengashiga Xitoy Fanlar akademiyasi rahbari Xou Szyanʼgo boshchilik qiladi. Kengashda Turdiqulova akademiyaning strategiyasini ishlab chiqish, xalqaro ilmiy aloqalar va tadqiqotchilarni qoʻllab-quvvatlash bilan shugʻullanadi. U 2025-yildan buyon TWAS aʼzosi hisoblanadi.

Butunjahon fanlar akademiyasiga 1983-yilda fizika boʻyicha Nobel mukofoti laureati Abdus Salom tashabbusi bilan asos solingan. U 112 mamlakat olimlarini birlashtiradi, YuNESKOning dasturiy boʻlinmasi sifatida faoliyat yuritadi, shtab-kvartirasi esa Triest shahrida joylashgan.

Turdiqulova — biologiya fanlari doktori, professor, Ilgʻor texnologiyalar markazi rahbari. U 2002–2005-yillarda Los-Anjelesdagi Kaliforniya universitetida postdoktorant boʻlgan. U boshchilik qilgan ishlanmalar qatoriga COVID-19 uchun birinchi Oʻzbekiston PZR-testi va Oʻzbekiston-Xitoy ZF-UZ-VAC 2001 vaksinasi kiradi. 2024-yil aprel oyida u Oʻzbekiston Fanlar akademiyasi vitse-prezidenti lavozimini egallagan birinchi ayol boʻldi.