Oʻzbekistonda taʼlim oluvchilar va pedagoglar uchun har yili psixodiagnostika oʻtkazish joriy etildi

Tizim bosqichma-bosqich yoʻlga qoʻyiladi. 2026/27-oʻquv yilidan boshlab tekshiruvlar maktabgacha taʼlim tashkilotlari va umumiy oʻrta taʼlim muassasalarida boshlanadi, 2027/28-oʻquv yilidan boshlab esa ularga kollejlar, texnikumlar va oliy taʼlim muassasalari, yaʼni oʻrta maxsus, professional va oliy taʼlim tashkilotlari qoʻshiladi. Diagnostikani alohida elektron platformada Psixologiya ilmiy-tadqiqot instituti oʻtkazadi. Hujjat shaxsiy maʼlumotlar, shuningdek, tekshiruv yakunlari boʻyicha olingan axborotlarning maxfiyligini kafolatlaydi.

Natijalarni sunʼiy intellekt yordamida qayta ishlash rejalashtirilgan. Ishtirokchilar uchta guruhga boʻlinadi: psixologik barqarorlar, psixologik qoʻllab-quvvatlashga muhtojlar hamda faol psixologik qoʻllab-quvvatlashga muhtojlar. Ikkinchi guruhga taʼlim tashkilotining oʻz psixologi, uchinchi guruhga esa tegishli hududga masʼul boʻlgan mentor-psixolog biriktiriladi.

Institutning oʻzi Nizomiy Ganjaviy nomidagi Oʻzbekiston Milliy pedagogika universitetining Psixologiya oʻquv-ilmiy markazi negizida tashkil etiladi va Taʼlim va fan vazirligiga boʻysunadi. 2027-yil 1-yanvardan boshlab unda uchta laboratoriya: raqamli psixologiya va SI, taʼlim psixologiyasi va psixologik xizmat, shuningdek, psixologik salomatlik va profilaktika laboratoriyalari faoliyat boshlashi kerak.

Kaskadli malaka oshirish kurslarida dars beradigan psixologlar ushbu davr uchun asosiy ish joyidagi lavozim maoshiga 20% ustama oladi. Oʻquv yili davomida yuqori natijalarga erishgan yana 150 nafar mentor-psixolog mehnatga haq toʻlashning eng kam miqdorining 20 baravari miqdorida bir martalik mukofotlanadi. Taʼlim muassasalari psixologik xizmatlari xodimlariga kamida besh yilda bir marta malaka oshirish majburiyati yuklatildi.