Farmon: Taʼlim va fan vazirligi huzurida shikoyatlar uchun koll-markaz tashkil etiladi

Koll-markaz autsorsing shartlari asosida faoliyat yuritadi. Uning vazifalari — murojaatlarni qabul qilish, ularni tezkor koʻrib chiqish, tegishli tashkilotlarga yuborish va qabul qilingan choralar haqida arizachilarga xabar berishdan iborat. Shuningdek, idora taʼlim xizmatlarining sifati va ommabopligi toʻgʻrisidagi maʼlumotlarni toʻplash va tahlil qilish uchun aholi va soha xodimlari bilan qayta aloqa tizimini joriy etadi.

Vazir huzurida oʻquvchilar, talabalar, ota-onalar, pedagoglar va ish beruvchilardan iborat Taʼlim masalalari boʻyicha jamoatchilik kengashi shakllantiriladi. Vazirlik hayʼati 15 kishidan iborat boʻladi: vazir, uning oʻrinbosarlari, idora huzuridagi agentliklar direktorlari, yetakchi OTMlar rektorlari, olimlar va pedagoglar. Taʼlim va fan vaziri Erkin Turdimov 2027-yil 1-fevralga qadar istisno tariqasida markaziy apparatga xodimlarni suhbat natijalariga koʻra ishga qabul qilish huquqini oldi.

Vazirlik tuzilmasida Inson kapitalini rivojlantirish jamgʻarmasi hamda Taʼlim va fan sohasida strategik tadqiqotlar va baholash markazi paydo boʻladi, shuningdek, Bilim va malakalarni baholash agentligi (Anhor.uz talqinida — Bilim va koʻnikmalarni baholash agentligi) faoliyati tashkil etiladi. Maktabgacha va maktab taʼlimi vazirligi huzuridagi Taʼlimni rivojlantirish markazi oʻz faoliyatini toʻxtatadi (Anhor.uz da u Respublika taʼlim markazi deb nomlangan).

Prezident Administratsiyasi huzurida inson kapitali va uzluksiz taʼlimni rivojlantirish strategiyasi konsepsiyasi bilan shugʻullanuvchi ishchi guruh tuzilmoqda. Podrobno.uz eslatishicha, unga jamoatchilik asosida tadbirkor Zafar Hoshimov rahbarlik qiladi.