Oliy taʼlim vazirligi toshkentlik talabalarning Xavfsiz talaba ilovasi boʻyicha shikoyatlarini tekshiradi

Oʻzbekiston davlat jahon tillari universiteti talabalari 3-noyabr kuni ertalab ularni kirish joyida ushlab turishgani va dasturni yuklab olishni soʻrashganini aytishdi. Talabalarning soʻzlariga koʻra, shu sababli darsga kechikkanlarga «qoldirilgan» degan belgilar qoʻyilgan. Darslar vaqtida auditoriyalarga dekanlar, ularning oʻrinbosarlari va tyutorlar kirib kelgan, rad etganlarga esa tanbeh berilgan. Jahon iqtisodiyoti va diplomatiya universiteti talabasi bunday iltimoslar taxminan ikki haftadan beri yangrayotganini xabar qildi. Toshkent davlat yuridik universiteti talabalari maʼmuriyatning iltimoslari va ilovani oʻrnatmaganlar roʻyxati haqida gapirmoqda. Talabalarning bir qismi dastursiz ularni OTMlarga va darslarga kiritishmayotganini taʼkidlamoqda.

Vazirlikda vaziyat nazoratga olingani, ishchi guruh esa tekshiruvga kirishgani maʼlum qilindi. «Vazirlik taʼlim jarayonining uzluksizligi va talabalarning taʼlim olish huquqini taʼminlash muhimligini taʼkidlaydi», — deyiladi idora xabarida. Kursiv qayd etganidek, vazirlikning eʼlon qilingan materiallarida ilovasi boʻlmagan talabalarni darslarga kiritmaslik talabi yoʻq.

Xavfsiz talaba ilovasida dars jadvali, oʻzlashtirish va davomat maʼlumotlarini koʻrish, kontrakt toʻlash, elektron talabalik guvohnomasi va QR-koddan foydalanish, murojaatlar yuborish mumkin. Shuningdek, 102 raqamiga oʻxshash tezkor xizmatni chaqirish uchun SOS tugmasi ham mavjud. Platformani faol joriy etish oktabr oyida boshlangan edi; oʻshanda vazirlik videokuzatuv, kirish nazorati va yotoqxona maʼlumotlarini yagona vaziyatlar markazi bilan birlashtirishni muhokama qilgan.