Oʻzbekistonda OTM bitiruvchisi sifati indeksi metodikasi tasdiqlandi

Indeks har yili 1-iyuldan keyingi yilning 30-iyunigacha boʻlgan davr uchun toʻrtta indikator: ishga joylashish tezligi, uning barqarorligi, oʻrtacha oylik daromad va bandlik toifasi boʻyicha hisoblanadi. Indeksning joriy etilishi Prezidentning 2026-yil 10-apreldagi farmonida nazarda tutilgan.

Bitiruvchi oʻqishni tamomlaganidan keyin bir yil ichida qanchalik tez ish topsa, koeffitsiyent shunchalik yuqori boʻladi: birinchi oyda — 4, uch oy ichida — 3, yarim yil ichida — 2. Barqarorlik hisobot yilida kamida olti oy tanaffussiz ishlaganlar ulushi boʻyicha aniqlanadi; 10 ish kunigacha boʻlgan tanaffuslarga ruxsat etiladi. Daromad oʻrtacha oylik nominal ish haqi boʻyicha hisoblanadi va ushbu koʻrsatkichi eng yaxshi boʻlgan OTM bilan taqqoslanadi.

Bandlik toifasi boʻyicha yuridik shaxslar xodimlari, oʻz yuridik shaxslari muassislari, taʼlim tizimi xodimlari, 90 kundan ortiq muddatga chet elga ketganlar hamda Ijtimoiy reyestrga kiritilganlar 2 koeffitsiyentini, yakka tartibdagi tadbirkorlar esa 1,5 koeffitsiyentini oladi. Oʻzini oʻzi band qilgan shaxslar, fuqarolik-huquqiy shartnomalar boʻyicha ishlovchilar, oilaviy korxonalar va dehqon xoʻjaliklarida band boʻlganlar hamda ikki yoshgacha boʻlgan bolasini parvarish qilayotganlar koeffitsiyentsiz hisobga olinadi. Ijtimoiy reyestrdagi bitiruvchilar uchun eng yuqori koeffitsiyentlar qoʻllaniladi, barqarorlikni baholashda esa ular barqaror ishga joylashgan deb hisoblanadi. Agar bitiruvchi bir nechta toifaga toʻgʻri kelsa, eng yuqori koeffitsiyent olinadi.

Eng yaxshi natijalarga erishgan 20 ta OTMning Karyera markazlari har yili 500 mln soʻmdan ragʻbatlantirish oladi — bu PF-58-son farmon va sentabr oyi oxirida Vazirlar Mahkamasi tomonidan tasdiqlangan nizomda nazarda tutilgan.