QS Asia 2027 reytingi: Oʻzbekiston 38 ta OTM bilan taqdim etildi

Reytingda Osiyoning 26 ta mamlakati va hududidan jami 1722 ta universitet oʻrin olgan. Oʻzbekiston OTMlarining 19 tasi dastlabki mingtadan, oltitasi top-500 dan va ikkitasi top-200 dan joy oldi. Mamlakatimizning 15 ta oliy taʼlim muassasasi ushbu roʻyxatga ilk bor kiritildi.

TIIAME oʻtgan yilgi 103-oʻringa nisbatan 10 pogʻona pastladi. Mirzo Ulugʻbek nomidagi Oʻzbekiston Milliy universiteti 180-oʻrindan 196-oʻringa tushdi, Samarqand davlat universiteti esa 307-oʻrindan 215-oʻringa koʻtarildi. Toshkent davlat iqtisodiyot universiteti — 255-oʻrinda, Toshkent davlat texnika universiteti — 281-oʻrinda. Oʻzbekiston OTMlari orasida eng yuqori oʻsishni Namangan davlat texnika universiteti koʻrsatib, 469-oʻrinni egalladi. Markaziy Osiyo boʻyicha hisobda TIIAME toʻrtinchi, OʻzMU toʻqqizinchi, Samarqand davlat universiteti esa 11-boʻldi.

Navoiy davlat konchilik va texnologiyalar universiteti reytingda ilk bor qatnashib, 791–800-diapazonda joylashdi. Reyting 11 ta mezon asosida tuziladi. QS baholashiga koʻra, Oʻzbekiston OTMlari ish beruvchilar oʻrtasidagi obroʻ, chet ellik oʻqituvchilar ulushi va talabalar almashinuvida kuchli, ammo iqtiboslik darajasi hamda har bir oʻqituvchiga toʻgʻri keladigan nashrlar sonida eng zaif hisoblanadi. «Keyingi oʻsish ilmiy-tadqiqot salohiyatini oshirishga bogʻliq boʻladi», — dedi QS katta vitse-prezidenti Ben Sauter.