Toshkent hokimi «Paxtakor»ga 5 mlrd soʻm ajratish toʻgʻrisidagi qarorni imzoladi

Mablagʻ klubning tasdiqlangan smeta boʻyicha xarajatlariga yoʻnaltiriladi. Bular qaysi moddalar ekani va qanday summalarda ekani qarorning eʼlon qilingan matnida koʻrsatilmagan, deb qayd etadi Gazeta.uz. Klubning 26-oktabrdagi hamda Toshkent shahar hokimligining «Munitsipal aktivlarni boshqarish markazi» DUKning 29-oktabrdagi murojaatlari bunga asos boʻldi.

Ushbu markazga ajratilayotgan summa hisobiga «Paxtakor»ning ustav fondidagi oʻz ulushini oshirish va mablagʻlarning maqsadli sarflanishini nazorat qilish topshirildi. Hokimning moliya, iqtisodiyot va kambagʻallikni qisqartirish masalalari boʻyicha birinchi oʻrinbosari Dilshod Xudoyberganov «Toshkent Invest» AJ kuzatuv kengashiga taklif kiritishi kerak, kompaniya esa mablagʻlarning oʻtkazib berilishini taʼminlaydi. Qaror ijrosi toʻgʻrisidagi hisobot xalq deputatlari Toshkent shahar Kengashiga taqdim etiladi.

19-oktabr kuni klub «Navbahor» bilan oʻyindagi hakamlik boʻyicha bayonotida asosiy homiysidan ayrilganini tan oldi, biroq gap kim haqida ketayotganiga oydinlik kiritmadi. Avgust oyida Toshkent shahrining sobiq hokimi, tadbirkor Jahongir Ortiqxoʻjayev jamoani qoʻllab-quvvatlashni toʻxtatayotgani haqida norasmiy xabarlar paydo boʻlgan edi; bosh murabbiy Kamoliddin Tojiyev oʻshanda buni tasdiqlamagan.

May oyida Podrobno.uz eslatishicha, Vaqt.uz nashri iHamkor.uz portaliga tayanib, 2025-yil yakunlariga koʻra klub 128,9 mlrd soʻm xarajat qilgan holda 50,8 mlrd soʻm zarar koʻrganini xabar qilgan edi. 2026-yilda jamoalar davlat byudjetidan 560 mlrd soʻm — har biri 35 mlrd soʻmdan oladi.