Oʻzbekiston kurashchilari Ostonadagi JCh-2026 da kumush va ikkita bronza oldi

67 kg gacha boʻlgan vazn toifasida kumush medalni Aytjan Xalmaxanov qoʻlga kiritdi. U finalda Parij-2024 olimpiya chempioni eronlik Said Esmoiliga 0:8 hisobida magʻlub boʻldi; Kursiv Uzbekistan maʼlumotlariga koʻra, eronlik kurashchi muddatidan oldin gʻalaba qozondi. Oʻzbekistonlik sportchi hal qiluvchi bahsgacha amerikalik Otto Blek (12:1) va armanistonlik Slavik Galstyanni (4:0) magʻlub etgan edi. Xalmaxanov 2025-yilgi jahon chempionatini 63 kg gacha vazn toifasida yutgan, shundan soʻng u ogʻirroq toifaga oʻtgan.

Ozodbek Xalimboev (63 kg gacha) chorak finalda armanistonlik Karen Aslanyanga 0:9 hisobida yutqazdi. Raqibining finalga chiqishi unga sovrin uchun kurashni davom ettirish imkoniyatini berdi va uchinchi oʻrin uchun kechgan bahsda Xalimboev bolgariyalik Edmond Nazaryanni magʻlub etdi (7:3). Musobaqada Oʻzbekiston uchun ilk medalni bronza uchun bellashuvda Germaniya vakilini yenggan Alisher Gʻaniyev (60 kg gacha) keltirdi.

Qozogʻiston poytaxtidagi musobaqa 24-oktabrdan 1-noyabrgacha davom etadi hamda yunon-rum, erkin va ayollar kurashini oʻz ichiga oladi. Oʻzbekiston har bir yoʻnalishda toʻqqiz nafardan jami 27 nafar sportchini maydonga tushirdi. Yunon-rum kurashchilarining musobaqalari 27-oktabr kuni yakunlandi, oldinda erkin kurashchilar va ayollarning chiqishlari kutmoqda.