2027-yildan Prezident olimpiadasi gʻoliblariga beriladigan mukofotlar 2,5 baravarga oshadi

Olimpiada chempioni 25 mln soʻm, kumush medal sohibi — 12 mln, bronza medali sohibi esa 6 mln soʻm oladi. Musobaqalarda gʻolib boʻlib, Oʻzbekiston rekordini yangilagan maktab bitiruvchilari oliy oʻquv yurtlarining sport yoʻnalishlariga kirish imtihonlarisiz davlat granti asosida oʻqishga qabul qilinadi.

Har yili 50 nafar gʻolib xalqaro oʻquv-mashgʻulot yigʻinlariga xorijga yuboriladi. Oʻz yoʻnalishida eng yaxshi natija koʻrsatgan sport maktabi zarur jihozlar bilan taʼminlanadi. Dasturdagi sport turlari sonini 35 tagacha yetkazish rejalashtirilgan, yosh chegaralari esa kengaytiriladi: 14 yoshdan 17 yoshgacha boʻlgan oʻquvchilar bellashadi. Poytaxtdagi Olimpiya shon-shuhrati muzeyi Olimpiya shaharchasiga koʻchiriladi.

Joriy olimpiadada turli hududlardan 3,5 mingdan ortiq yosh sportchi ishtirok etmoqda, ular 26 ta olimpiya va paralimpiya sport turi boʻyicha bellashadi. Ishtirokchilarni 1,5 mingga yaqin murabbiy tayyorlamoqda. Marosimda soʻzga chiqqan Prezident Shavkat Mirziyoyev soʻnggi oʻn yilda Oʻzbekiston sportchilari yirik xalqaro musobaqalarda 5 518 ta medal, shu jumladan 1 675 ta oltin medalni qoʻlga kiritganini, bu esa oldingi oʻn yillikka nisbatan uch baravar koʻp ekanini maʼlum qildi.