"Real" "Barselona"ni 2:1 hisobida magʻlub etdi, Mbappe klubdagi 100-golini urdi

Oʻyin "Kamp Nou"da boʻlib oʻtdi. Madridliklarning ikkala goliga Kilian Mbappe mualliflik qildi: u 41 va 87-daqiqalarda oʻz nomini tabloga yozdirib qoʻydi. "Barselona" safida esa 61-daqiqada Rafinya gol urdi.

Ushbu uchrashuvdagi ikkinchi toʻp fransiyalik hujumchi uchun 2024-yil yozida kelib qoʻshilgan "Real" safidagi 100-gol boʻldi. UzDaily maʼlumotlariga koʻra, Mbappe jamoa safida 100 va undan ortiq gol urgan klub tarixidagi 24-futbolchiga aylandi. Madridliklar oʻyinni asosiy darvozabon Tibo Kurtualarsiz oʻtkazishdi: u gripp sababli uchrashuvni oʻtkazib yubordi.

Magʻlubiyat "Barselona"ning chempionat startida ketma-ket qayd etgan toʻqqizta gʻalabadan iborat seriyasiga chek qoʻydi. Ular 1968/69-yilgi mavsumni xuddi shunday boshlagan "Real"ning yutugʻini yangilay olishmadi.

Oʻn turdan soʻng "Barselona" 27 ochko bilan peshqadamlikni saqlab qolmoqda, "Real" esa 24 ochko bilan uchinchi oʻrinda bormoqda. Keyingi turda "Barselona" 31-oktabr kuni oʻz maydonida "Alaves" bilan oʻynaydi, "Real" esa bir kun oʻtib safarda "Rasing" bilan uchrashadi.