Mirziyoyev terma jamoani Paraosiyo oʻyinlaridagi 45 ta oltin medal bilan tabrikladi

Prezidentning soʻzlariga koʻra, Oʻzbekiston jamoasi Xitoy va Yaponiya bilan birga kuchli uchlikdan joy olib, Hindiston, Janubiy Koreya, Eron, Tailand va Indoneziya terma jamoalarini ortda qoldirdi. Murojaatda keltirilishicha, Aichi-Nagoyadagi musobaqalarda Osiyoning 45 ta mamlakatidan 2 600 dan ortiq parasportchi ishtirok etdi. Delegatsiya qoʻlga kiritgan oltin medallarning yarmi sportchi xotin-qizlar hissasiga toʻgʻri keldi.

Pauerliftingchi Roʻza Qoʻziyeva oltin medalni qoʻlga kiritib, jahon rekordini oʻrnatdi. Murojaatga koʻra, yadro uloqtirishda Madina Muxtorova va Karomat Omonova, nayza uloqtirishda Shahina Yigitaliyeva, disk uloqtirishda Navroʻza Ahmadova, shuningdek, 100 metrga chalqancha suzish hamda 200 metrga kompleks suzishda Yegor Bolotov Osiyo rekordlarini yangiladi. Paravelosport, pauerlifting va parayengil atletika boʻyicha yana 16 nafar sportchi Paraosiyo oʻyinlari rekordlarini yangiladi.

Ushbu oʻyinlarda debyut qilgan Bolotov parasuzish boʻyicha toʻrtta oltin va bitta kumush medalga sazovor boʻldi. Delegatsiya bayroqdori Marjona Pardaboyeva paravelosport boʻyicha ikki karra Osiyo chempioni boʻldi, 15 yoshli sportchi esa mamlakatga trekdagi paravelosport boʻyicha Paraosiyo oʻyinlaridagi ilk oltin medalni keltirdi va murojaatda taʼkidlanganidek, eng yosh chempionga aylandi. Dmitriy Xorlin toʻrtinchi bor Paraosiyo oʻyinlari shohsupasiga koʻtarildi.

Prezident Yaponiyada qoʻlga kiritilgan natija va toʻplangan tajriba 2028-yilda Los-Anjelesda boʻlib oʻtadigan Paralimpiya oʻyinlariga tayyorgarlik uchun mustahkam poydevor boʻlishiga ishonch bildirdi.