"Fulhem" Yangi Toshkentda futbol akademiyasini ochishni koʻrib chiqmoqda

Bu masala Londonda, klub vakillari Oʻzbekistonning Buyuk Britaniyadagi elchixonasi diplomatlari bilan uchrashgan joyda muhokama qilindi. "Fulhem" tomonidan muzokaralarda klubda futbolni rivojlantirish yoʻnalishini boshqarayotgan Xyu Jennings hamda yetakchi tijorat menejeri Brett Makgoldrik ishtirok etdi. Agentlik maʼlumotlariga koʻra, uchrashuv Prezidentning Yangi Toshkent qurilishini jadallashtirishga bagʻishlangan investorlar va tadbirkorlar bilan ochiq muloqotida bildirilgan topshiriqlari ijrosi doirasida boʻlib oʻtdi.

Oʻzbekiston tomoni britaniyalik mehmonlarga mamlakatda futbolni rivojlantirish choralari, yosh oʻyinchilarni izlash va qoʻllab-quvvatlash, shuningdek, Yangi Toshkentda sport obyektlarini bunyod etish rejalari haqida soʻzlab berdi. Klub yosh futbolchilarni Britaniya uslublari va standartlari boʻyicha tayyorlaydigan akademiya istiqbollarini oʻrganishga tayyorligini bildirdi.

Uchrashuv yakunlariga koʻra tomonlar hamkorlikning aniq mexanizmlarini ishlab chiqishga kelishib oldilar. Akademiyani ochish boʻyicha yakuniy qaror hozircha yoʻq, loyihaning ehtimoliy ishga tushirilish muddatlari maʼlum qilinmagan.