Osiyo kubogi-2027: Oʻzbekiston guruh bosqichini Iordaniyaga qarshi oʻyin bilan boshlaydi

Iordaniyaga qarshi dastlabki oʻyin 8-yanvar kuni Jiddadagi King Abdullah Sports City stadioniga belgilangan. Boshlanishi Toshkent vaqti bilan 21:30 da (mahalliy vaqt bilan 19:30 da). 12-yanvar kuni Ar-Riyoddagi Kingdom Arena stadionida Fabio Kannavaro jamoasi KXDR bilan uchrashadi, 17-yanvar kuni esa Jiddadagi Prince Abdullah Al Faisal Sports City arenasida Bahrayn bilan oʻynaydi. Har ikki oʻyin Toshkent vaqti bilan 18:30 da (mahalliy vaqt bilan 16:30 da) boshlanadi.

1/8 finalga har bir guruhning eng kuchli ikki terma jamoasi hamda uchinchi oʻrinni egallaganlar orasidan eng yaxshi toʻrtta jamoa yoʻl oladi. Guruh bosqichi 20-yanvarda yakunlanadi, 1/8 final oʻyinlari esa ikki kundan keyin boshlanadi. Chorak finallar 28 va 29-yanvarga, yarim finallar esa 1 va 2-fevralga rejalashtirilgan.

Turnir 2027-yil 7-yanvardan 5-fevralgacha boʻlib oʻtadi, unda 24 ta milliy terma jamoa ishtirok etadi. Saudiya Arabistoni Osiyo kubogiga ilk bor mezbonlik qiladi, mazkur turnir hisob boʻyicha 19-si boʻladi. Ochilish marosimi 7-yanvar kuni Ar-Riyodda mezbonlarning Falastin bilan 72 ming tomoshabinga moʻljallangan King Fahd Sports City stadionidagi oʻyini bilan boʻlib oʻtadi, 5-fevral kuni final ham aynan shu yerda oʻtkaziladi. Jami uchta shahardagi sakkizta arenada 51 ta oʻyin rejalashtirilgan: Ar-Riyodda beshta, Jiddada ikkita va Al-Xobarda bitta stadion.