Sindarov Sent-Luisdagi turnirning soʻnggi kuni oldidan ikkinchi oʻrinni boʻlishib turibdi

Hindistonlik Ramesh Babu Pragnanandha 11 ochko bilan peshqadamlik qilmoqda, amerikalik Hikaru Nakamurada esa 8 ochko bor. Nakamura birinchi kunni toʻrt ochko bilan yetakchi sifatida yakunlagan edi, ammo ikkinchi kuni Pragnanandhaga ikki bor imkoniyatni boy berdi. Sindarov ham oʻsha kuni hindistonlik shaxmatchiga ikki partiyada yutqazdi.

Turnirda toʻrt nafar ishtirokchi qatnashmoqda, ularning har biri rapid boʻyicha 18 tadan partiya oʻynaydi, har kuni oltitadan, vaqt nazorati — har bir yurish uchun besh soniya qoʻshilgan holda 10 daqiqa. Natijaning qimmati oshib boradi: 27-oktabr kuni gʻalaba bir ochko, durang yarim ochko keltirgan boʻlsa, 28-oktabr kuni — ikki va bir ochko, soʻnggi kun, yaʼni 29-oktabrda esa gʻalaba uchun uch ochko, durang uchun bir ochko beriladi. Yakuniy partiyalar Toshkent vaqti bilan soat 22:00 da boshlanadi. Agar birinchi oʻrinda bir xil ochkoga ega bir nechta shaxmatchi paydo boʻlsa, gʻolibni «Armageddon» aniqlaydi.

Sovrin jamgʻarmasi 425 ming dollarni tashkil etadi, shundan 125 ming dollarini gʻolib oladi. Har bir yutilgan partiya uchun qoʻshimcha bonus toʻlanadi: birinchi kuni 1000 dollar, ikkinchi kuni 2000 va uchinchi kuni 3000 dollar.

20 yoshli Sindarov uchun bu Jenevada Dommaradju Gukeshga qarshi jahon chempioni unvoni uchun boʻladigan uchrashuv oldidan soʻnggi start hisoblanadi. Match 22-noyabr kuni boshlanadi, ilk partiya 24-noyabrga belgilangan, raqiblar klassik nazorat bilan 14 tagacha partiya oʻynaydi; uchrashuv Gazeta.uz maʼlumotlariga koʻra 12-dekabrda yakunlanishi kerak (Podrobno.uz va Nuz.uz 13-dekabr deb koʻrsatmoqda). Jurnalistlarga javob berar ekan, Sindarov ushbu matchdagi gʻalaba qozonish imkoniyatini 50,1 foizga, Gukeshning imkoniyatini esa 49,9 foizga baholadi.