Sogʻliqni saqlash vazirligi: Oʻzbekistonda vabo boʻyicha epidsituatsiya barqarorligicha qolmoqda

Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Otabekovning soʻzlariga koʻra, mamlakatga oʻta xavfli infeksiyalar kirib kelishining oldini olish boʻyicha ishlar davom etmoqda. Xalqaro aeroportlar, temiryoʻl vokzallari va avtomobil oʻtkazish punktlarida 53 ta sanitariya-nazorat punkti faoliyat yuritmoqda, chet eldan kelayotganlar ustidan tibbiy kuzatuv olib borilmoqda. Vazirlik maʼlumotlariga koʻra, bunday infeksiyalarga tekshiruv oʻtkaziladigan hududiy laboratoriyalar diagnostika vositalari, ozuqa muhitlari va reaktivlar bilan toʻliq taʼminlangan.

Rospotrebnadzorga tayanib berilgan xabarda aytilishicha, Irkutsk viloyatidagi holatning vabo bilan, jumladan, uning oʻpka shakli bilan bogʻliqligi hozircha tasdiqlanmagan, tadqiqotlar davom etmoqda. Gap Irkutskning yoʻldosh shahri hisoblangan Shelexovda 2-oktabrga oʻtar kechasi vafot etgan vaboga qarshi kurash instituti xodimi haqida bormoqda.

Qoʻmita 3-oktabr kuniyoq Rossiya idoralari va Jahon sogʻliqni saqlash tashkilotining rasmiy maʼlumotlari boʻyicha vaziyatni kuzatib borayotganini hamda xavfli infeksiyalar mamlakatga kirib kelishi va tarqalishining oldini olish maqsadida xizmatlarning shayligini kuchaytirganini maʼlum qilgan edi. Qoʻmita aholidan tekshirilmagan maʼlumotlarga ishonmaslikni va faqat rasmiy manbalardan foydalanishni soʻradi.