Davlat klinikalari 2027-yildan xizmatlarni xususiy sektordan autsorsing asosida xarid qila boshlaydi

2027-yil 1-yanvardan davlat tibbiyot muassasalari tibbiy va yordamchi xizmatlarni xususiy sektordan xarid qilishning yangi tartibiga oʻtadi. Qarorga koʻra, ijrochilar bilan shartnomalar koʻpi bilan besh yil muddatga tuziladi: muddat xizmat xususiyati va investitsiyalar hajmiga bogʻliq boʻladi. Sogʻliqni saqlash vazirligining investitsiyalarning oʻzini oqlash muddatiga asoslangan xulosasi mavjud boʻlganda oʻn yilgacha boʻlgan muddatga shartnoma tuzishga ruxsat etiladi. Yangi qoidalar kuchga kirgunga qadar tugaydigan amaldagi loyihalar muddatini 2027-yil oxirigacha uzaytirish mumkin.

2030-yilga borib davlat klinikalari tomonidan autsorsing asosida xarid qilinadigan xizmatlar ulushini bosqichma-bosqich 30 foizga yetkazish rejalashtirilgan. Hujjatning yana bir maqsadi — kamida beshta yirik tibbiyot tashkilotiga xorijiy kompaniyalar va professional boshqaruvchilarni jalb qilishdir. Boshqaruvchilar, qoidaga koʻra, ochiq tanlov asosida tanlab olinadi va har yili KPI boʻyicha baholanadi, baholash natijalariga qarab esa shartnoma uzaytiriladi, qayta koʻrib chiqiladi yoki bekor qilinadi.

2027-yildan sohada davlat va biznesning oʻzaro hamkorligi uzoq muddatli va qisqa muddatli master-rejalarga asoslanadi. Davlat tomonidan kafolatlangan tibbiy yordam koʻrsatuvchi muassasalar davlat tasarrufida qoladi. 2027-yil 1-aprelgacha loyihalar, ijrochilar va shartnomalarning yagona reyestrini oʻz ichiga olgan «Tibbiyot autsorsingi» elektron tizimi ishga tushishi kerak. Shu muddatga qadar Bosh prokuratura Sogʻliqni saqlash vazirligi hamda Davlat aktivlarini boshqarish agentligi bilan birgalikda tibbiyot muassasalarining bino, xona va yer maydonlarini ijaraga berish shartnomalarini xatlovdan oʻtkazadi.